На чарговым сходзе у гандлёвым цэнтры «Эвіком» індывідуальныя прадпрымальнікі Віцебску выказаліся за вяртаньне на свае працоўныя месцы толькі пасьля скасаваньня ўказу № 222. Акрамя таго, некаторыя зь іх ня толькі вырашылі падтрымаць акцыю ў абарону прадпрымальніцтва, якая мусіць прайсьці ў Менску 18 студзеня, але і абвясьцілі пра свой намер выставіць палітычныя патрабаваньні ды нават заклікалі выйсьці на Плошчу.

Разгледзеўшы зварот сяброў першаснай арганізацыі Свабоднага прафсаюзу работнікаў ААТ «Полацак-Шкловалакно», кіраўнік полацкай эпідэміялягічнай службы Міхаіл Гурыновіч заявіў: «У санітарных нормах і правілах адсутнічаюць патрабаваньні да абавязковага прыняцьця душу работнікамі пасьля заканчэньня працоўнай зьмены». У той самы час інструкцыя па ахове працы абавязвае большасьць рабочых заводу прымаць душ пасьля працы.

Для дробнага бізнэсу ўказ №222 невыканальны. Казаць пра гэта трэба ўсімі даступнымі мэтадамі. Пра гэта заявіла адна зь лідэраў віцебскіх прадпрымальнікаў Ірына Яскевіч. Яна распавяла пра сытуацыю на рынках абласнога цэнтру.

Зэканомленыя 370 мільёнаў палачанін Яраслаў Пачопка прапануе выдаткаваць на добраўпарадкаваньне гораду. «У краіне, а тым больш у Полацку, цяпер нялёгкія часы, таму траціць 17 тысяч даляраў на новае аўто для “служак народу” мы лічым няслушным!» – гаворыцца ў пэтыцыі, разьмешчанай на сайце www.change.org.

Месца пахаваньня савецкіх вайскоўцаў часоў Другой сусьветнай вайны сябрам партыі КХП БНФ Яну Дзяржаўцаву і Пятру Сарапеню паказала Секачова Людміла Сямёнаўна, жыхарка вёскі Казлы. Ва ўшанаваньне памяці пахаваных напрыканцы мінулага году партыйныя актывісты ўсталявалі драўляны крыж.