Свае ўражаньні ад наведваньня Віцебскага інфэкцыйнага шпіталя апісала на старонцы «Укантакце» адна з пацыентак: «Выклікалі хуткую - у дзіцяці тэмпэратура 39.5°. Ехала яна 2 гадзіны, забралі нас у інфэкцыйную больніцу, пра якую шмат чула. Паўтаруся, у дзіцяці тэмпэратура 39.5, а ў палаце +10, коўдры варушацца ад ветру, каля акна стаяць невыносна. Адчуваньне, што рамонту не было з самага адкрыцьця гэтай больніцы», - піша жанчына.

З надыходам эканамічнага крызысу на віцебскіх рынках усё часьцей можна сустрэць людзей, якія займаюцца несанкцыянаваным гандлем. Пакупнікам прапануюць ужыванае адзеньне і абутак, кнігі, выдадзеныя за савецкім часам, прадукты харчаваньня з хатняй гаспадаркі і разнастайныя іншыя рэчы, прыдатныя, на думку ўладальнікаў, для продажу.

Суд Полацкага раёну і гораду Полацку 3 лютага пакінуў у дзеяньні пастанову падатковых органаў аб прыцягненьні да адміністрацыйнай адказнасьці прадпрымальніцы Веры Русецкай, якая перашкаджала праводзіць праверку.

Паводле апэратыўных дадзеных Віцебскага абласнога ўпраўленьня Дэпартамэнту дзяржаўнай інспэкцыі працы ў 2015 годзе ў паўночным рэгіёне зарэгістраваныя 19 няшчасных выпадкаў на вытворчасьці са сьмяротным і 76 – зь цяжкім зыходам, у тым ліку ў арганізацыях АПК 6 са сьмяротным і 21 зь цяжкім зыходам.

Полацкі прадпрымальнік Генадзь Бердзянёў не падтрымлівае прапанову грамадзкай арганізацыі «Пэрспэктыва», агучаную на сходзе індывідуальных прадпрымальнікаў, – правесьці мітынг на менскай плошчы Бангалор. Ён заклікае прадстаўнікоў малога бізнэсу з усіх гарадоў Беларусі аб’яднацца, каб разам выйсьці на акцыю пратэсту на галоўнай плошчы Менску.