Віцебская абласная пошта дасылае беларускамоўныя тэлеграмы, запісваючы іх пры дапамозе расейскага альфабэту. Такую тэлеграму атрымаў грамадзкі актывіст Ільля Заранок.

У «Славянскім маршы», што прайшоў 25 лістапада ў Магілёве, узяў удзел былы прэтэндэнт у прэзыдэнты зь Віцебску Сяргей Рыжоў. Ён вылучаў сваю кандыдатуру на выбары 2010 году, але за два месяцы да іх зьняўся. Падчас магілёўскай акцыі Рыжоў заявіў, што «зараз славянскія дзяржавы разьдзеленыя, што адмоўна ўплывае на жыцьцё і дабрабыт народаў».

У Віцебску адбылася інфармацыйная сустрэча праваабарончага праекту “ГейБеларусь”. З прычыны бясьпекі сустрэча ладзілася ў закрытым рэжыме. Але здымачнай групе парталу Dyjalog.info дазволілі ладзіць відэаздымкі - з умовай, што ў поле зроку відэакамэры ня трапяць тыя, хто хоча захаваць сваю ананімнасьць.

Вольга Гайдукова, маці зьняволенага ў СІЗА КДБ актывіста, апавяла са словаў адваката, што 22 лістапада сына дапытваў сьледчы. Паводле спадарыні Гайдуковай, Андрэй дагэтуль не атрымаў лістоў з дому, і да сваякоў не дайшлі лісты, адпраўленыя ім. Зь першага дня затрыманьня Андрэй Гайдукоў напісаў дахаты тры лісты, кажа маці.

Віцебскія актывісты Беларускай хрысьціянскай дэмакратыі правялі акцыю “Калi сёньня ты замаўчыш, заўтра цябе нiхто не абаронiць”. Мэта акцыі – азнаёміць віцебчукоў з праўдай пра “выбары”. Падчас акцыі актывісты распаўсюдзілі па паштовых скрынях бюлетэні са зьвесткамі пра тое, як фальшаваліся мінулыя “выбары” ў Беларусі.