Леанід Сьвецік хацеў трапіць на першае паседжаньне выбарчай камісіі Кастрычніцкага раёну Віцебску. Але намесьнік старшыні Віцебскага гарвыканкаму Пётар Падгурскі заявіў, што ягоная прысутнасьць «непажаданая».

Віцебскі лекар Ігар Пастноў прасіў Лідзію Ярмошыну разабрацца наконт нібыта выкарыстаньня мясцовымі ўладамі адміністрацыйнага рэсурсу на карысьць прэтэндэнта ў кандыдаты Аляксандра Лукашэнкі. Адказ старшыні Цэнтральнай камісіі па выбарах уразіў яго сваёй ляканічнасьцю.

У Наваполацку мясцовыя ўлады забаранілі правядзеньне 16 ліпеня на Плошчы Будаўнікоў пікетаваньня з мэтай інфармаваньня грамадзян аб наяўнасьці ў Беларусі палітвязьняў. Пра гэта гаворыцца ў адказе за подпісам намесьніка старшыні Наваполацкага гарвыканкаму Альберта Шакеля актывісту аргкамітэту БХД Андрэю Гайдукову.

10 ліпеня Віцебскім абласным судом быў вынесены прысуд заснавальніку ПКПУ «Платформ инавэйшан» Міхаілу Жамчужнаму. Паводле рашэньня суду праваабаронца правядзе 6 гадоў у калёніі строгага рэжыму, таксама на 2 гады і 8 месяцаў Міхаіл пазбаўлены права выконваць арганізацыйна-прававыя функцыі. Раней пракурор запрасіў для Міхаіла 7 гадоў пазбаўленьня волі.

Выконваючая абавязкі старшыні Мазалаўскага сельскага выканаўчага камітэту Кацярына Каралёва шукае сустрэчы з апазыцыйнымі актывістамі, якія пры канцы красавіка паведамілі ў прэсе пра новыя знаходкі чалавечых парэшткаў з прыкметамі гвалтоўнай сьмерці ў лесе ў ваколіцах вёскі Хайсы Віцебскага раёну.