7 лютага на тэлеканале «Беларусь 1» выйшла ў сьвет тэлеперадача сэрыі «Клюб рэдактараў», у якой была дадзеная нэгатыўная ацэнка дзейнасьці праваабаронцаў. На думку віцебскага праваабаронцы Паўла Левінава, удзельнікі перадачы нанесьлі абразу праваабаронцам, чым зьдзейсьнілі адміністрацыйнае правапарушэньне. Ён зьвярнуўся ў міліцыю з патрабаваньнем прыцягнуць правапарушальнікаў да адказнасьці.

Скаргу на службовую асобу ў Віцебскі гарвыканкам падавалі сябры КХП-БНФ Ян Дзяржаўцаў, Пятро Сарапеня і Алег Емяльянаў. Намесьніца старшыні адміністрацыі Першамайскага раёну Віцебску Вольга Гурчанка адказала на іх заяўку на пікет, складзеную па-беларуску, на расейскай мове. Гэткім чынам, на думку скаржнікаў, чыноўніца парушыла Закон аб зваротах грамадзян і юрыдычных асоб, які патрабуе ад службоўцаў адказваць на мове звароту.

Глыбоцкага незалежнага журналіста Зьмітра Лупача не пусьцілі ў райвыканкам з фотаапаратам у торбе.

Незвычайнае судовае паседжаньне адбылося ў Віцебску. Праваабаронца Павал Левінаў падаў скаргу на дзеяньні чыноўніцы, якая забараніла яму праводзіць пікет, і прысутнічаў на паседжаньні, знаходзячыся... у сваёй кватэры. Суд прайшоў у выглядзе тэлеканфэрэнцыі праз інтэрнэт.

Валянціна Аліневіч сустрэлася з сынам у калёніі. «У суботу адбылося кароткатэрміновае спатканьне, - паведаміла маці палітвязьня. - Усё, як звычайна. Выехалі зь Менску ўранку, ня ведаючы, дадуць нам з мужам убачыць яго ці не. На гэты раз спатканьне адбылося, але права на перадачу, якая належыць адзін раз у чатыры месяцы, ён пазбаўлены».