Дзіцячага лекара Ігара Пастнова пазбавілі пасады. Ён на працягу некалькіх апошніх гадоў безупынна крытыкаваў кіраўніка Віцебскай вобласьці, лічачы, што па віне Аляксандра Косінца транжырацца бюджэтныя грошы.

30 лістапада, у гадавіну вынясеньня сьмяротнага прысуду Ўладзіславу Кавалёву і Дзьмітрыю Канавалаву, Ірына Багданава, Лера Красоўская і Любоў Кавалёва заклікалі сусьветную грамадзкасьць аб’яднацца і патрабаваць вярнуць цела Ўладзіслава Кавалёва яго сям’і. Відэазварот ад імя трох жанчын быў выпушчаны ў рамках кампаніі Любові Кавалёвай “Вярніце цела”, якую яна распачала на глябальнай пляцформе Change.org.

Грамадзянская кампанія «Наш дом» прааналізавала блізу 100 сьвежых вакансіяў з базы дадзеных Віцебскай службы занятасьці (за 27-28 лістапада). Вынік дасьледаваньня: сярэдняя зарплата па 98 вакансіях склала ўсяго 264 даляра - 2 млн. 270 тыс. рублёў. Не нашмат вышэй за ўзровень сярэдняй пэнсіі ў Беларусі.

Віцебскія аматары прыгожага пісьменства і сьпеваў атрымалі цудоўны падарунак – 27 лістапада ў абласной бібліятэцы прайшла сустрэча зь беларускім паэтам і эсэістам Леанідам Дранько-Майсюком і паэтам, бардам Эдуардам Акуліным. Гэткай жа кампаніяй яны прыяжджалі ў Віцебск і пяць год таму.

Затрыманы 8 лістапада наваполацкі актывіст Андрэй Гайдукоў знаходзіўся пад вартай у менскім СІЗА КДБ паводле абвінавачаньня ў здрадзе дзяржаве. Маці затрыманага паведаміла, што яго пераводзяць зь Менску ў Віцебск, але прычыны ёй не вядомыя.