На ААТ «КІМ» працягваюцца хваляваньні - як стала вядома, 25 верасьня страйкавалі работніцы швейнага цэху гэтага прадпрыемства. Крыніца паведамляе, што ў швейным цэху зьмена «А» спыніла працу на тры гадзіны, а зьмена «Б» прастаяла ўвесь працоўны час. Людзей абурыла тое, што пры запазычанасьці па заробку за два месяцы ім верасьня 24 выдалі па 250 000 рублёў.

Віцебскаму лекару Ігару Пастнову, які больш за месяц знаходзіўся на прымусовым лячэньні ў Віцебскім абласным клінічным цэнтры псыхіятрыі і наркалёгіі, прапанавалі працягнуць працу ў гэтай самай установе. «Я цяпер на бальнічным, мяне ніхто і ня звольніў. Галоўны ўрач прапануе мне стаць лекарам-нарколягам», - распавёў Пастноў, які раней працаваў у гэтым жа цэнтры псыхіятрам.

Напрыканцы жніўня пачаў працаваць сайт газэты “Вітебскіе весті”, заснавальнікам якой зьяўляецца Віцебскі аблвыканкам. Сайт зьмяшчае публікацыі з папяровай газэты, а таксама публікуе PDF-вэрсію выданьня. Вэб-рэсурс вылучаецца высокім узроўнем дызайну. Штодня ен публікуе 5-6 навінаў. Аднак чытачоў пакуль што вобмаль: рэдка які матэрыял набірае больш за 100 праглядаў.

Віцебскі праваабаронца Пётар Іваноў атрымаў са Сьледчага камітэту чарговае паведамленьне пра адмову ва ўзбуджэньні ў дачыненьні да яго крымінальнай справы. Раней сьледчыя органы ўжо двойчы выносілі пастановы аб адмове ва ўзбуджэньні крымінальнай справы супраць яго, але потым тыя пастановы былі адмененыя. Ня выключана, што і чарговая пастанова будзе адмененая, і справа ўсё-такі будзе ўзбуджаная. Пятру Іванову па-ранейшаму пагражае зьняволеньне на тэрмін да 3-х гадоў.

У сувязі зь вялікай затрымкай выплаты заробкаў на ААТ «КІМ» 10-11 верасьня на прадпрыемстве адбыліся хваляваньні работнікаў. Як паведаміла «Народным навінам Віцебска» крыніца на фабрыцы, яшчэ ня выплачаная заработная плата за ліпень, а некаторым катэгорыям работнікаў - за чэрвень. 10 верасьня адмовілася працаваць другая зьмена аднаго з цэхаў, а 11 верасьня - першая.