Абвінавачаная ў зьдзяйсьненьні выбуху каля будынку КДБ у Віцебску 42-гадовая мясцовая жыхарка прызнала сваю віну ў судзе і распавяла пра матывы, якія штурхнулі яе на гэты ўчынак. Паводле ейных слоў, такім чынам жанчына хацела пасеяць паніку сярод супрацоўнікаў КДБ, бо лічыла, што яны нядбала паставіліся да пошуку хуліганаў, якія некалькі гадоў таму ўчынілі выбух у пад’езьдзе яе дому.

Віцебская абласная пракуратура адмовіла актывісту Сяргею Рыжову (на фота) ва ўзбуджэньні крымінальнай справы на падставе яго заявы пра факты ціску на лекара Ігара Пастнова, зьмешчанага на прымусовае псыхіятрычнае лячэньне.

17 верасьня праваабаронца Пётар Іваноў наведаў доктара Ігара Пастнова у Віцебскім абласным клінічным цэнтры псыхіятрыі і наркалёгіі, дзе той знаходзіцца на прымусовым лячэньні. Спадар Іваноў паведаміў, што напярэдадні яго візыту ў шпіталь адбылося паседжаньне ўрачэбна-кансультацыйнай камісіі, якая зьменшыла апальнаму доктару дозу нэўралептыкаў. Згодна з заключэньнем камісіі, неўзабаве Ігар Пастноў можа быць пераведзены на дзённы стацыянар.

Касацыйная скарга віцебскага лекара Ігара Пастнова наконт накіраваньня яго на прымусовае лячэньне ў абласны цэнтар псыхіятрыі і наркалёгіі пакінутая без задавальненьня, паведаміў мясцовы праваабаронца Леанід Сьвецік. Скарга была разгледжаная 12 верасьня Віцебскім абласным судом у закрытым рэжыме. Пастноў прасіў адмяніць рашэньне суду Віцебскага раёну і запрасіць яго на разгляд уласнай скаргі. Абедзьве просьбы задаволеныя не былі.

9 верасьня віцебскі актывіст Сяргей Рыжоў атрымаў падпісаную лекарамі віцебскага абласнога псыхіятрычнага шпіталя даверанасьць прадстаўляць інтарэсы лекара Ігара Пастнова, зьмешчанага на прымусовае псыхіятрычнае лячэньне. Але празь некалькі гадзінаў яму паведамілі, што забараняюць сустракацца з Пастновым.