17 верасьня праваабаронца Пётар Іваноў наведаў доктара Ігара Пастнова у Віцебскім абласным клінічным цэнтры псыхіятрыі і наркалёгіі, дзе той знаходзіцца на прымусовым лячэньні. Спадар Іваноў паведаміў, што напярэдадні яго візыту ў шпіталь адбылося паседжаньне ўрачэбна-кансультацыйнай камісіі, якая зьменшыла апальнаму доктару дозу нэўралептыкаў. Згодна з заключэньнем камісіі, неўзабаве Ігар Пастноў можа быць пераведзены на дзённы стацыянар.

Паводле праваабаронцы, Ігар Пастноў ня мае прэтэнзіяў, што да ўмоваў яго ўтрыманьня ў лякарні. Аднак ён па-ранейшаму лічыць, што над ім учынілі беззаконную расправу за яго публічныя выказваньні, і просіць падвергнуць гэтыя выказваньні экспэртызе.

Пастноў сьцьвярджае, што яго «ўвязьненьне дзеля прымусовага лячэньня ў засьценках Віцебскага абласнога клінічнага цэнтру псыхіятрыі і наркалёгіі» парушае яго правы. Знаходзячыся ў няволі, Ігар Пастноў ня мае магчымасьці самастойна абараніць сябе, таму ён аформіў даверанасьць на імя Пятра Іванова, каб апошні ажыцьцяўляў абарону яго правоў і законных інтарэсаў у дзяржаўных органах Беларусі і ў міжнародных арганізацыях.