Гэтая гісторыя распачалася ў сьнежні 2011 году. Многія жылі падрыхтоўкай да Калядаў і Новага году. І тое, што малады чалавек нападпітку трапіў у шпіталь, ні ў кога ня выклікала зьдзіўленьня. 27­-гадовы Алег Цімафееў увечары ў нядзелю выйшаў сустрэцца зь сябрам. Выпілі. Але дадому вярнуўся толькі раніцай. Зьбіты. «Мянты пабілі», — патлумачыў бацькам. А ўначы яго забралі ў шпіталь і праапэравалі. У шпіталі ён і памёр.

На прахадной ААТ “Полацак-Шкловалакно” ў пятніцу 15 лістапада быў выстаўлены сьцяг Свабоднага прафсаюзу Беларускага. Прафсаюз распаўсюджваў сваё інфармацыйнае выданьне «Мнение профсоюза». Прафсаюзны інфармацыйны дакумэнт раздаваўся рабочым, якія ішлі на зьмену і са зьмены.

Адмысловая камісія для вывучэньня ходу мадэрнізацыі ААТ “Віцебскдрэў” і праверкі выкананьня даручэньняў Аляксандра Лукашэнкі па пытаньнях дрэваапрацоўчай галіны створаная ў Віцебску, распавялі ў Камітэце дзяржаўнага кантролю па Віцебскай вобласьці.

Камітэт ААН па правох чалавека прыняў чарговае рашэньне наконт скаргі віцебскага актывіста КХП-БНФ Сяргея Каваленкі. Гэтым разам рашэньне станоўчае: камітэт прызнаў, што Рэспубліка Беларусь парушыла правы актывіста, і цяпер цягам 180 дзён дзяржаўныя чыноўнікі абавязаныя аднавіць яго правы, якія былі парушаныя, выплаціць адпаведную кампэнсацыю ды зрабіць захады, каб гэткіх парушэньняў правоў грамадзян з боку дзяржавы не было ў будучыні.

У цяперашні час тэрміновая дапамога віцебскаму лекару Ігару Пастнову, які быў падвергнуты прымусоваму псыхіятрычнаму лячэньню, больш не патрэбная. «Аднак дыягназ “псыхапатычнае разладзьдзе асобы з маніяй перасьледу ўладаў” застаўся, і ён можа зноў падвергнуцца лячэньню, калі працягне гэтаксама адкрыта крытыкаваць улады», – гаворыцца ў чарговым паведамленьні арганізацыі Amnesty International («Міжнародная амністыя»).