Рашэньне аб будаўніцтве буйнога гандлёвага цэнтру на месцы парку на прывакзальнай плошчы ў Полацку выклікала незадаволенасьць і нязгоду сярод жыхароў прылеглых дамоў па вуліцы Кастрычніцкай. Жыхары пачалі зьбіраць подпісы супраць будаўніцтва, а таксама сустрэліся і абмеркавалі гэтую праблему са старшынём аблвыканкаму Віцебскай вобласьці Аляксандрам Косінцам…

Віцебскі гарадзкі выканаўчы камітэт адмовіўся ўнесьці ў асобныя сьпісы на атрыманьне жылога памяшканьня сацыяльнага карыстаньня інваліда другой групы праваабаронцу Валера Місьнікава. Фармальнай прычынай таму стала даведка пра месца жыхарства і склад сям’і, выдадзеная Місьнікаву разьліковым цэнтрам № 4 дзяржаўнага прадпрыемства «ЖРЭТ Першамайскага раёну».

Намесьніца кіраўніка адміністрацыі Чыгуначнага раёну Віцебску Натальля Ляпёшкіна забараніла пікет, які праваабаронцы меркавалі зладзіць 19 кастрычніка. Яны хацелі абмеркаваць з жыхарамі гораду праблемы, зьвязаныя з наяўнасьцю і ўжываньнем сьмяротнага пакараньня ў Беларусі. Прычына забароны акцыі – адсутнасьць у яе арганізатараў дамоваў з ЖКГ, міліцыяй і мэдыкамі на яе абслугоўваньне.

У Першамайскім райсудзе Віцебску адбыўся разгляд скаргі актывістаў, якія прасілі абавязаць раённыя ўлады даць дазвол на правядзеньне пікету супраць разьмяшчэньня расейскіх вайсковых баз. Але прадстаўнікі Першамайскай раённай адміністрацыі наогул вырашылі не зьяўляцца на працэс, а суд пакінуў скаргу без задавальненьня. Скарга абласнога каардынатара руху “За свабоду” Хрыстафора Жаляпава і прадстаўніка аргкамітэту па стварэньні партыі “Народная Грамада” Аляксея Гаўруцікава тычылася забароны на пікет 8 верасьня.

Паводле праваабаронцы Паўла Левінава, у дачыненні да Ніны Шубінай, якая была старшынёй участковай камісіі № 52 Першамайскага раёну Віцебску на мінулых выбарах, мусіла праводзіцца праверка наконт парушэньня выбарчага заканадаўства. Але сама спадарыня Шубіна бясьсьледна зьнікла. З прычыны таго, што апытаць Ніну Шубіну немагчыма, праваабаронцу чарговы раз адмовілі ў тым, каб распачаць супраць яе крымінальную справу.