7 лютага на тэлеканале «Беларусь 1» выйшла ў сьвет тэлеперадача сэрыі «Клюб рэдактараў», у якой была дадзеная нэгатыўная ацэнка дзейнасьці праваабаронцаў. На думку віцебскага праваабаронцы Паўла Левінава, удзельнікі перадачы нанесьлі абразу праваабаронцам, чым зьдзейсьнілі адміністрацыйнае правапарушэньне. Ён зьвярнуўся ў міліцыю з патрабаваньнем прыцягнуць правапарушальнікаў да адказнасьці.

У Беларускіх дэмакратычных прафсаюзах апошнім часам назіраецца актывізацыя жанчын. Праца з жанчынамі-працаўніцамі вылучаная ў асобны накірунак дзейнасьці прафсаюзаў і завецца «Жаночая сетка». У незалежным прафсаюзе ААТ «Нафтан» узначальвае «Жаночую сетку» намесьніца старшыні першаснай арганізацыі Ніна Турчына.

У гандлёвым цэнтры «Эвіком» у Віцебску прайшоў сход прадпрымальнікаў. Некаторыя адмыслова прыйшлі на сустрэчу, бо зь 1 сакавіка так і не пачалі працаваць. Паводле Ірыны Яскевіч, удзельніцы аргкамітэту па стварэньні прафсаюзу прадпрымальнікаў «Разам», аднавілі працу каля паловы гандляроў.

Скаргу на службовую асобу ў Віцебскі гарвыканкам падавалі сябры КХП-БНФ Ян Дзяржаўцаў, Пятро Сарапеня і Алег Емяльянаў. Намесьніца старшыні адміністрацыі Першамайскага раёну Віцебску Вольга Гурчанка адказала на іх заяўку на пікет, складзеную па-беларуску, на расейскай мове. Гэткім чынам, на думку скаржнікаў, чыноўніца парушыла Закон аб зваротах грамадзян і юрыдычных асоб, які патрабуе ад службоўцаў адказваць на мове звароту.

Пракурорам Аршанскага раёну распачатая справа паводле часткі 1 артыкулу 210 КК (крадзеж шляхам злоўжываньня службовымі паўнамоцтвамі) у дачыненьні да дырэктара КУП «Аршанскае ПМС» (Прадпрыемства меліярацыйных сыстэмаў). Кіраўнік прадпрыемства падазраецца ў крадзяжы будматэрыялаў больш як на 7 мільёнаў рублёў.