Адказы на звароты грамадзян павінны быць вычарпальнымі. Такое меркаваньне па выніках наўпроставай лініі 14 лютага выказаў першы намесьнік старшыні Віцебскага аблвыканкаму Генадзь Грабнёў.

Паводле словаў Генадзя Грабнёва, толькі некалькі зь дзясяткаў тэлефанаваньняў, якія паступілі, патрабуюць умяшаньня абласных або рэспубліканскіх службаў, асноўная маса - гэта бягучыя пытаньні. "Складваецца ўражаньне, што на месцах гэтыя пытаньні насельніцтву растлумачваюцца не зусім карэктна. Людзі кажуць, што зьвярталіся ў мясцовыя органы, там зварот разгледжаны, але зразумелага, вычарпальнага адказу не атрымана, сутнасьць ня ясная", - сказаў першы намесьнік старшыні.

Ён лічыць, што ў пісьмовых адказах на звароты грамадзян павінны быць спасылкі на канкрэтныя артыкулы або пункты нарматыўных дакумэнтаў. "Праблема канкрэтная і яна патрабуе такога ж адказу, а не агульных фраз", - перакананы Генадзь Грабнёў. Апроч таго, пры складаньні адказаў неабходна ўлічваць узрост адрасата. Напрыклад, калі гэта малады чалавек, то досыць пазначыць інтэрнэт-партал, дзе можна азнаёміцца з адпаведным прававым актам, калі ж адрасат пажылы, то ня лішнім будзе прыкласьці да адказу вытрымку з артыкулу.

"На простых лініях праблемы ўзьнімаюцца адны і тыя ж, а гэта значыць, што неабходна актывізаваць працу органаў мясцовага кіраваньня базавага ўзроўню. Задача будзе пастаўленая ўсім службам, у тым ліку і ідэалягічнаму кіраваньню з тым, каб праблемныя тэмы шырока камэнтаваць ў СМІ", - сказаў Генадзь Грабнёў. Ён таксама дадаў, што больш увагі трэба надаваць анансаваньню простых лініяў райвыканкамаў - інфармацыя пра іх правядзеньне і нумарах тэлефонаў павінна быць на сайтах і на тэлебачаньні.

14 лютага на простую лінію Віцебскага аблвыканкаму паступіла 40 тэлефанаваньняў, а пытаньняў было зададзена яшчэ на дзясятак больш. Збольшага тэлефанавалі жыхары Віцебску, былі звароты з Наваполацку, Воршы, Полацку, Гарадка, Расонаў. Падчас простай лініі дадзеныя тлумачэньні, а таксама даручэньні аб прыняцьці апэратыўных мераў рэагаваньня. Усе пытаньні ўзятыя на кантроль.

БелТА