11 траўня больш за дзьвесьце чалавек сабралася каля рытуальнай залі абласнога клінічнага шпіталя ў Віцебску, каб разьвітацца зь любімым паэтам. На жалобнай урачыстасьці прысутнічалі супрацоўнікі практычна ўсіх устаноў культуры гораду, прадстаўнікі грамадзкіх і творчых арганізацыяў, прыйшлі былыя калегі Давіда Рыгоравіча па тэлебачаньні і проста жыхары Віцебску.

На просьбу палачан пра сьпілоўку буйных засохлых дрэваў у двары жылых дамоў Полацкі райвыканкам абяцае абсьледаваць дрэвы. Год таму ў двары шматкватэрных дамоў па праспэкце Скарыны каля дзіцячай пляцоўкі павалілася падсохлае дрэва. На шчасьце, абышлося без трагедыі. На сёньня яшчэ два сухастоі вышынёй ад 10 да 15 мэтраў пагражаюць мінакам.

8 траўня сустаршыня аргкамітэту па стварэньні партыі «Беларуская хрысьціянская дэмакратыя» Павал Севярынец быў выкліканы ў крымінальна-выканаўчую інспэкцыю Фрунзэнскага раёну Менску, дзе яму вынесьлі афіцыйнае папярэджаньне «пра недапушчальнасьць супрацьпраўных дзеяньняў». Павал Севярынец зьвязвае гэта з чэмпіянатам сьвету па хакеі, які распачынаецца ў Менску.

Вызваленьне з калёніі «Віцьба-3» палітвязьня Андрэя Гайдукова стала сапраўднай спэцапэрацыяй, арганізаванай з мэтай не дапусьціць ягоную сустрэчу ля турэмнай брамы. Андрэю Гадукову загадалі пачаць зьбіраць рэчы а 6-й раніцы, хоць звычайна з калёніі выпускаюць аб 11-й. А 7-й яго пасадзілі ў міліцэйскі аўтамабіль, адвезьлі на вакзал у Віцебску, далі 20 тысяч рублёў, каб ён змог даехаць да сваякоў. Такім чынам, каля турэмнай брамы яго сустрэць не ўдалося.

У Віцебску адбылося першае паседжаньне сяброў і прыхільнікаў "Беларускай хрысьціянскай дэмакратыі", якія ў межах кампаніі "Народнае самакіраваньне" будуць вырашаць праблему пабудовы паліклінічнага комплексу ў мікрараёне Білева. На паседжаньні былі абмеркаваныя пытаньні кампаніі, прайшоў трэнінг, а пасьля ўдзельнікі паседжаньня выйшлі "ў поле". За адзін дзень сабрана больш за 200 подпісаў. Пробны выхад быў яшчэ 2 траўня, калі было сабрана 107 подпісаў.