У Віцебскай вобласьці за парушэньні прыродаахоўнага і зямельнага заканадаўства да дысцыплінарнай, адміністрацыйнай і матэрыяльнай адказнасьці прыцягнутыя 373 асобы, паведаміла старшы памочнік пракурора вобласьці па наглядзе за выкананьнем прыродаахоўнага заканадаўства Алена Казлова. За 6 месяцаў бягучага году ў гэтай сфэры было арганізавана 96 праверак, па выніках якіх падрыхтавана 309 актаў рэагаваньня, па патрабаваньнях пракурораў кампэнсаваныя матэрыяльныя страты на суму звыш Br80 млн.

Суд Полацку 18 жніўня адмовіўся разглядаць пазоў супраць ААТ «Полацак-Шкловалакно» аб ліквідацыі дыскрымінацыі ў працоўных адносінах. Заяву ў суд накіроўваў старшыня Свабоднага прафсаюзу рабочых заводу «Шкловалакно» Віктар Стукаў (на фота). Гэта быў паўторны зварот у суд па наноў адкрытых абставінах, аналягічная адмова суду ў судовай абароне была ў сакавіку 2013 году.

Некалькі дзясяткаў жыхароў Віцебску падпісаліся пад калектыўным лістом у Савет Міністраў з просьбай паспрыяць зьмене рашэньня Віцебскага гарвыканкаму №881 “Аб масавых мерапрыемствах у г. Віцебску” і ініцыяваць зварот у Канстытуцыйны суд для праверкі адпаведнасьці гэтага дакумэнту Канстытуцыі Рэспублікі Беларусь. Абласны каардынатар руху “За свабоду” Хрыстафор Жаляпаў атрымаў адказ.

Эўрапейскі Зьвяз выдаткаваў 300 тысяч эўра на навучаньне беларускіх чыноўнікаў для стварэньня пляну ўстойлівай мабільнасьці ў Полацку. Ужо прайшло некалькі мерапрыемстваў, што фінансуюцца з гэтых сродкаў з удзелам эўрапейскіх экспэртаў: сэмінар для прадстаўнікоў гарадзкіх службаў, круглы стол з удзелам палачан, паседжаньне працоўнай групы праекту.

Больш як на 600 мільёнаў рублёў былі завышаныя аб'ёмы будаўнічых работ на аб'ектах сыстэмы аховы здароўя ў Віцебскай вобласьці. Як паведаміў Камітэт дзяржаўнага кантролю, такая сытуацыя характэрная для будаўніцтва ўсіх сацыяльна значных аб'ектаў.