Кандыдат у дэпутаты па Віцебскай-Чкалаўскай акрузе №18 Аляксандар Мікулін ладзіў 12 верасьня агітацыйнае пікетаваньне ў новым віцебскім мікрараёне Білева – насупраць адміністрацыйнага будынку кандытарскага камбінату “Віцьба”. Кіраўніцтву фабрыкі гэта вельмі не спадабалася.

Кандыдата ў дэпутаты па віцебскай-Чкалаўскай выбарчай акрузе № 18 Аляксея Гаўруцікава выклікалі ў РАУС Першамайскага раёну Віцебска і вярнулі рэчы, канфіскаваныя 30 жніўня падчас вобшуку аўтамабіля, на якім ён вяртаўся зь Менску.

Вядомы віцебскі апазыцыянэр Барыс Хамайда прастаяў ля “сіняга дому” ў Віцебску з плякатам “Незаконным выбарам у незаконную „палатку“ – байкот!” некалькі гадзін. Пасьля гэтага яго затрымалі і адвезьлі ў Чыгуначны РАУС Віцебску.

Раніцай 30 жніўня ў г. Віцебску быў затрыманы Алег Шрамук, стваральнік суполкі «Надоел нам этот Лукашенко» ў сацыяльнай сетцы Вконтакте. Сябры і сваякі Алега зьвязваюць затрыманьне зь яго актыўнай грамадзянскай пазыцыяй і стварэньнем ім інтэрнэт-суполкі, якая налічвала каля 40 тысяч падпісчыкаў. Напярэдадні «Надоел нам этот Лукашенко» была ўзламаная, рахунак Алега быў актыўны, і ішло актыўнае выдаленьне інфармацыі з суполак і са старонкі Алега.

Сустаршыня “Беларускай хрысьціянскай дэмакратыі”, палітвязень Павал Севярынец пракамэнтаваў новы прысуд лідэру “Маладога Фронту” Зьмітру Дашкевічу (дадатковы год турмы): “Судзілішча над Дашкевічам – вельмі сур’ёзная рэч. Па-першае, цяпер паняцьце ‘дасядзець да званка’ для палітвязьняў адмяняецца. Колькі будзе рэжым – столькі будуць і палітвязьні. І, магчыма, некаторым давядзецца адбыць у турме столькі ж, колькі ва ўладзе будзе Лукашэнка. Такім чынам, гэта сыгнал і прысуд усім вязьням сумленьня”.