Віцебскі раённы аддзел Сьледчага камітэту разгледзеў заяву актывістаў, якія прасілі распачаць крымінальную справу па факце знойдзеных імі 28 красавіка ў лясным масіве непадалёк ад вёскі Хайсы чалавечых костак. З адказу СК, атрыманага актывістамі, вынікае, што «ў цяперашні момант падстаў для ўзбуджэньня крымінальнай справы ня маецца».

Мяркуючы па ўсім, знойдзеныя косткі належалі некалькім дзясяткам ахвяраў. Актывісты ўпэўненыя, што ў лесе пад Хайсамі ў 30-я гады мінулага стагодзьдзя зьдзяйсьняліся масавыя расстрэлы людзей. Апроч узбуджэньня крымінальнай справы, яны таксама прасілі сьледчых правесьці эксгумацыю і прызначыць неабходныя экспэртызы.

Зрэшты, крымінальная справа, магчыма, будзе распачатая пазьней – пасьля таго, як будзе праведзеная праверка. Як доўга будзе доўжыцца пачатая праверка – раённы аддзел Сьледчага камітэту заяўнікам не паведаміў.

Віцебская вясна