7 лістапада ў Віцебску так і не адбыўся пікет, заяўку на правядзеньне якога ў адміністрацыю Чыгуначнага раёну падавалі пяцёра сяброў Кансэрватыўна-хрысьціянскай партыі БНФ. Намесьніца старшыні раённай адміністрацыі Натальля Ляпёшкіна забараніла акцыю, спаслаўшыся на рашэньне Віцебскага гарвыканкаму «Аб масавых мерапрыемствах у горадзе Віцебску».

У перадпачатку сусьветнай кампаніі «Станем за журналістыку» на знак салідарнасьці з калегамі па ўсім сьвеце прадстаўнікі незалежных сродкаў масавай інфармацыі Віцебску пасадзілі невялічкую алею, якую ўпрыгожылі папяровымі птушкамі, зробленымі са старых газэтаў.

Пасьля разгляду касацыйнай скаргі і ўступленьня прысуду ў законную сілу віцебскі праваабаронца Міхаіл Жамчужны апынуўся ў карантыне ў папраўчай калёніі №14 у пасёлку Навасады Барысаўскага раёну Менскай вобласьці. Пра гэта ён паведаміў праваабаронцу Леаніду Сьвеціку, зь якім ён мае ліставаньне.

Актывісты ўсталявалі крыж ва ўрочышчы «Цёплы лес» каля пасёлку Лужасна Віцебскага раёну. А таксама аднавілі адзін з крыжоў на ўзьлеску каля вёскі Хайсы – паставілі новы замест скрадзенага невядомымі вандаламі.

Перад выходнымі 23 кастрычніка ў вёсцы Стаўры Аршанскага раёну ішлі работы па падсыпцы вуліцы Пуцяціна. Пасьля работ засталося некалькі вялікіх кавалкаў асфальту, якія былі скінутыя ў рэчышча Куцеенкі. Прычым у тое самае месца, дзе летам гэтага году мясцовыя жыхары ладзілі суботнік па прыборцы.