Заробкі супрацоўнікам на 1 лютага ня выплацілі 77 прадпрыемстваў Віцебскай вобласьці, паведамляе Нацыянальны статыстычны камітэт. Сярод даўжнікоў перад работнікамі - ААТ "Клясыка індустрыі моды", ААТ "Сьцяг індустрыялізацыі", камбінат ядвабных тканін, завод "Эвістар", прадпрыемства вылічальнай тэхнікі і інфарматыкі (Віцебск), Гарадоцкі льнозавод, прадпрыемства "Салодкая краіна" (Ворша), ААТ "Купцовъ" (Глыбокае), цэлы шэраг сельскагаспадарчых прадпрыемстваў у раёнах вобласьці.

На 1 студзеня бягучага году 996 замежных грамадзян і 94 асобы без грамадзянства, якія атрымалі дазвол на сталае пражываньне ў Рэспубліцы Беларусь, стаяць на ўліку ў аддзяленьні па грамадзянстве і міграцыі Віцебскага РАУС, паведаміла начальнік падразьдзяленьня Вольга Ткачонак.

За мінулы год значна зьнізілася колькасьць разгляданых судом Віцебскага раёну спраў па ўсіх катэгорыях. Пра гэта, падводзячы вынікі, распавяла старшыня суду раёну Марына Гарохава.

У студзені супрацоўнікі Камітэту дзяржкантролю праверылі шэраг гандлёвых пунктаў у Віцебскім і Гарадоцкім раёнах. За пастаўку ў крамы Віцебскай вобласьці прадукцыі зь мінулымі тэрмінамі прыдатнасьці да адказнасьці прыцягнутыя 10 вінаватых асобаў.

Леанід Аўтухоў, актывіст партыі БНФ, атрымаў ліст з Гарадоцкага цэнтру занятасьці. Яму паведамілі, што здымаюць яго з уліку і больш ня будуць займацца ягоным працаўладкаваньнем.