Эканамічнае падзеньне на Віцебшчыне працягваецца. У студзені–жніўні 2017 году толькі ў дзьвюх абласьцёх краіны – Віцебскай і Магілёўскай – сукупны рэгіянальны прадукт (СРП) прадоўжыў падзеньне, што цягнулася ў беларускіх рэгіёнах два гады. У чатырох іншых абласьцёх Беларусі СРП пачаў расьці.

Аляксандар Лукашэнка параўнаў даходнасьць ад ільнаводзтва з рэнтабэльнасьцю ад здабычы і продажу нафты і даручыў кіраваць ў ільняной галіне «сталінскімі мэтадамі». Кіраўнік Беларусі наведаў 19 жніўня Рэспубліканскае вытворчае ўнітарнае прадпрыемства «Вусьце» Нацыянальнай акадэміі навук у Аршанскім раёне.

У Полацку сталі затрымліваць выплату пэнсіяў на карт-рахункі банкаў. Так, Прыёрбанк затрымаў выплату пенсіі на два дні. Пэнсіянеры, якія атрымлівалі пэнсію 7-га чысла, у жніўні атрымалі толькі 9-га. Работнікі банку кажуць, што полацкая Ўправа па працы, занятасцi i сацыяльнай абароне не падала сьпісаў на выплату пэнсіяў.

Ва ўсіх раёнах Віцебскай вобласьці пракуратурай выяўленыя парушэньні парадку правядзеньня працэдур дзяржаўных закупак, што стварае спрыяльную глебу для карупцыі.

За 9 месяцаў бягучага году ў Гарадоцкім раёне было афіцыйна зарэгістравана 375 беспрацоўных (за такі самы леташні пэрыяд – 388). На працягу гэтага часу працу знайшлі 273 жыхары раёну. Такія дадзеныя падае служба занятасьці рэгіёну.