У лютым 2013 году ў Віцебску на месцы былога бэрнардынскага кляштару распачалося будаўніцтва адміністрацыйна-гандлёвага цэнтру. Будынак, што будуецца, зьяўляецца прыбудовай да дому №35 па вуліцы Леніна, які адносіцца да помнікаў архітэктуры канца XIX - пачатку XX стагодзьдзя. Нягледзячы на гэта, разам з новай прыбудовай абносяць бэтонным плотам і частку гістарычнага будынку, перакрываючы свабодны доступ да помніку архітэктуры, што зьяўляецца парушэньнем права на доступ да культурных каштоўнасьцяў.

Эўрапейскі клюб на вуліцы Сеньненскай наладзіў чарговую цікавую імпрэзу для зацікаўленых віцебчукоў. Цяпер гэта быў выступ менскага Тэатру пана Скіргайлы Палянэцкага-Мацкевіча. Уласна самому выступу папярэднічала грунтоўная дзьвюхгадзінная лекцыя пра гісторыю батлейкі, прыёмы маніпуляцыі нашае сьвядомасьцю, а таксама пра найбольш пашыраныя памылкі пры вырабе ўласных батлеек і лялек для іх.

У старажытным Полацку з 23 па 25 траўня праходзіў фэст сярэднявечнай культуры «Рубон». Імпрэза ладзілася ля муроў Сафійскага сабору, уваход на тэрыторыю сьвята каштаваў 3 даляры ў беларускім эквіваленце. Асноўныя падзеі фэсту адбыліся ў суботу: турніры, конкурсы, канцэрты, тэатральныя шоў. У нядзелю, апошні дзень сьвяткаваньняў, людзей вакол сафійкі было зусім няшмат: стаяла сьпякота, і многія хаваліся ў цень.

У Лучаі Пастаўскага раёну маліліся за Беларусь. Там прайшоў фэст з нагоды ўспаміну беларускага пакутніка Андрэя Баболі. "Ён скончыў жыцьцё ў страшэнных пакутах – кажа ксёндз Марат Казлоўскі, - але не адрокся ад сваёй ідэі еднасьці хрысьціян". За свае перакананьні яго забілі ў Янаве Палескім, зараз горад Іванава Берасьцейскай вобласьці.

Скульптурная кампазыцыя ўсталяваная на плошчы паміж касьцёлам і царквой насупраць Алеі знакамітых землякоў. Устаноўка гэтай скульптурнай кампазыцыі прымеркаваная да 600-гадовага юбілею Глыбокага. Найбліжэйшымі днямі чакаецца афіцыйнае адкрыцьцё скульптуры.