Глыбоцкая суполка ГА “Беларуская асацыяцыя журналістаў” разам з калегамі з “Каталіцкага весьніка” зладзіла сэмінар “Інфармацыйная разнастайнасьць у рэгіёнах”. У якасьці трэнэраў былі запрошаныя Аляксандар Коктыш і Аляксандар Класкоўскі. На сэмінары прысутнічалі як пачаткоўцы, так і журналісты зь вялікім досьведам працы з газэты “Вольнае Глыбокае”, сайту “Весткі-інфо”, "Радыё Рацыя", а таксама каталіцкіх выданьняў.

На пачатку адбыўся кантэнт-аналіз мясцовых СМІ. Разглядаўся матэрыял, аналізаваўся, а потым журналісты дзяліліся меркаваньнямі пра артыкулы.

Вялікая частка сэмінару была адведзеная на разгляд жанраў журналістыкі. Зацікаўленасьць у прысутных выклікаў рэпартаж. Трэнэры падрабязна расказалі пра этапы яго падрыхтоўкі і прапанавалі ў групах распрацаваць плян работы над рэпартажам па любой з актуальных тэмаў. Пасьля гэтай працы шмат хто з пачаткоўцаў з упэўненасьцю сказаў, што абавязкова ў хуткім часе зробіць свой першы рэпартаж.

Яшчэ адной тэмай, якая разглядалася на сэмінары, было напісаньне артыкулаў для інтэрнэт-выданьняў. Журналісты разьбіраліся, у чым нататкі і артыкулы ў інтэрнэце адрозьніваюцца ад газэтных. Закранулі і крытэры вызначэньня якасьці і эфэктыўнасьці апублікаваных матэрыялаў.

Таксама Аляксандар Коктыш і Аляксандар Класкоўскі распавялі, як правільна працаваць з крыніцамі інфармацыі, і зьвярнулі ўвагу на этычныя моманты ў журналістыцы.

Аляксандар Класкоўскі напрыканцы распавёў пра тое, чым аналітычная журналістыка адрозьніваецца ад прапагандысцкай. На разьвітаньне арганізатару сэмінару і галоўным рэдактарам падараваў сваю кнігу “Уключы мазгі і не дзяўбі іх іншым, або Як пісаць аналітыку”.

Беларуская асацыяцыя журналістаў