Адміністрацыя ААТ “Полацак-Шкловалакно” сьцьвярджае, што праблеме гарачага харчаваньня на прадпрыемстве надаецца самая сур’ёзная ўвага. Маўляў, сталоўкі, кулінарыя, малочны пункт забясьпечваюць завадчан якаснай ежай, выпечкай, прадуктамі, у цэхах абсталююцца пакоі прыёму ежы, куды набываюцца неабходныя электрапрыборы. Аднак у цэху № 7 пакою прыёму ежы дагэтуль няма, хаця інтэнсыўнасьць працы работнікаў цэху вельмі высокая, і не заўсёды ёсьць час схадзіць у сталоўку.

Рабочыя цэху ядуць прынесеную з сабой ежу проста на працоўных месцах. Апэратары вытворчасьці “Шкловалакна” за свае грошы “ў складчыну” купляюць сабе электрычныя імбрыкі і гатуюць на працоўным месцы гарачыя напоі, каб спатоліць голад.

Адміністрацыя прадпрыемства праз сваю газэту, рэклямуючы прадзяржаўны прафсаюз, распавяла як работнікам складу прафсаюз за прафсаюзныя ж ўзносы (за грошы саміх рабочых) купіў электраімбрык для брыгады. Але, як лічаць сябры незалежнага прафсаюзу, пяршоўка якога таксама дзейнічае на прадпрыемстве, калі б гэта быў сапраўдны прафсаюз рабочых, то такі прафсаюз прымусіў бы адміністрацыю абсталяваць у цэху паўнавартасны пакой прыёму ежы зь імбрыкам, кававаркай, лядоўняй і мікрахвалёўкай. “Жоўты прафсаюз ня мае традыцыяў і жаданьня змагацца за інтарэсы працоўных. Прасьцей не ўступаць у канфлікт з адміністрацыяй, а за грошы рабочых купіць ім просты электрычны імбрык, абы толькі адчапіліся…” - лічаць прыхільнікі свабоднага прафсаюзу.

Свабодны прафсаюз - Полацак