Па справе выбуху каля КДБ у Віцебску затрыманым застаецца адзін чалавек. Астатніх падазраваных сьледчыя Сьледчага камітэту адпусьцілі. Пра гэта паведамляе агенцтва «Інтэрфакс-Захад».

Выбух у Віцебску быў зьвяном у дзіўным ланцугу здарэньняў. 5 лістапада на беларуска-польскай мяжы адбыўся выбух. 6 лістапада невядомыя кінулі кактэйль Молатава ў летувіскую амбасаду ў цэнтры Менску. 8 лістапада ў Наваполацку й Віцебску затрымалі двух маладых рабочых, аднаго зь іх абвінавацілі ў здрадзе дзяржаве.

9 лістапада было абвешчана пра вызваленьне ад пасады кіраўніка КДБ генэрала Зайцава. Замянілі яго не на намесьніка, а на кіраўніка Рады Бясьпекі, а адстаўку зьвязалі са сьмерцю падпалкоўніка КДБ Казака — сьмерцю, якую Камітэт доўгі час адмаўляў, нібы тых мядзьведзікаў.

А 11 лістапада ў Віцебску каля КДБ адбываецца выбух «самаробнага піратэхнічнага прыстасаваньня», у выніку якога пашкоджаныя два акны. Між тым ад 12 лістапада ў краіне ўступаюць у сілу дапаўненьні ў законы аб барацьбе з тэрарызмам і супрацьдзеяньні экстрэмізму.

Пра віцебскі выбух вядома, што ён быў зусім ня моцным, але пацягнуў за сабой шматлікія затрыманьні ў горадзе. Мяркуючы па інфармацыі некаторых затрыманых, бралі хлопцаў у чорных куртках з капюшонамі.

Чарада малазначных, але гучных здарэньняў апошняга тыдня, на першы погляд, выглядае нібы чыясьці спроба накаліць абстаноўку ў грамадзтве.

“Наша Ніва”