Аляксандар Мікулін (на здымку) накіраваў зварот да старшыні Віцебскага аблвыканкаму Аляксандра Косінца, дзе просіць прыняць адпаведныя захады – не дапускаць «скоцкага стаўленьня» для людзей, якіх прымушаюць працаваць у антысанітарных умовах дзеля выкананьня загадаў вышэйшага кіраўніцтва.

Спадар Мікулін – дэпутат Віцебскага офісу «Грамадзянскай дамовы», ініцыятывы кампаніі «Гавары праўду», накіраванай на абарону правоў мясцовага насельніцтва.

Ён распавёў, што па электроннай пошце да яго прыйшоў ліст з Воршы, ад работнікаў тамтэйшых прадпрыемстваў, якіх абавязалі ехаць у калгасы, каб «ратаваць» ураджай:

«Людзі пісалі, што іх накіравалі ў Талачынскі раён, у яблыневы сад каля пасёлку Коханава на так званую “даборку” яблыкаў. Было гэта 26 кастрычніка, і ў той дзень выпаў першы сьнег. Схавацца ад яго не было куды, людзі мерзьлі, а машыны, каб загрузьціць сабраныя яблыкі, давялося чакаць даволі доўга. Пад сьнегападам стаялі настаўнікі, урачы, работнікі прамысловых прадпрыемстваў, якіх даслалі ў гаспадарку “па разнарадцы”, не падумаўшы пра тое, у якіх умовах ім давядзецца ажыцьцяўляць тую “шэфскую дапамогу”».

Гарадзкія «шэфы» даслалі Аляксандру Мікуліну і відэаздымкі сваёй працы пад сьнегападам. Віцебскі актывіст пэўны, што такія выпадкі не адзінкавыя. Бо ў незалежныя СМІ трапіла адмысловая тэлефанаграма Віцебскага аблвыканкаму, дзе гаворыцца пра тэрміновую «мабілізацыю» людзей на ўборку лёну да 22 кастрычніка. І, ня даўшы рады да гэтага часу, у асобных гаспадарках Глыбоцкага раёну ўбіраць лён з-пад сьнегу накіравалі навучэнцаў ліцэю.

«Каб прадухіліць надалей такі зьдзек, я зьвярнуўся непасрэдна да старшыні аблвыканкаму. Каб ён, як кіраўнік вобласьці, абавязаў кіраўнікоў сельгаспрадпрыемстваў забясьпечыць элемэнтарны мінімум, што да ўмоваў працы гарадзкіх “шэфаў”. Бо інакш выкарыстаньне іхнай працы, у тым ліку прымусовай працы моладзі – гэта зьдзек і проста скоцкае стаўленьне да чалавечае асобы», - кажа Аляксандар Мікулін.

Праваабарончы цэнтар “Вясна”