Адміністрацыя Кастрычніцкага раёну Віцебску забараніла актывісту КХП-БНФ Яну Дзяржаўцаву праводзіць пікет на знак пратэсту супраць разьмяшчэньня вайсковых баз Расейскай Фэдэрацыі на тэрыторыі Рэспублікі Беларусь. Пікет мусіў адбыцца 14 верасьня. Прычына забароны пікету – заяўнік ня выканаў умоваў рашэньня гарвыканкаму № 881 «Аб масавых мерапрыемствах у г. Віцебску».

Згаданае рашэньне было прынятае віцебскімі гарадзкімі ўладамі ў ліпені 2009 г. Яно патрабуе ад арганізатараў масавага мерапрыемства заключыць дамовы са службамі ЖКГ, міліцыі і мэдыкамі, перш як падаць заяўку на яго правядзеньне. Названыя службы ўсяляк ухіляюцца ад заключэньня патрэбных дамоваў, таму прадстаўнікам дэмакратычных сіл з моманту прыняцьця рашэньня № 881 не ўдалося правесьці ніводнай легальнай акцыі.