Гандляваць становіцца ўсё цяжэй, а ўлады не дапамагаюць, а наадварот робяць умовы працы дробных прадпрымальнікаў усё больш складанымі. Як прыгадвае старшыня стваранага прафсаюзу „Разам“ Ірына Яскевіч зь Віцебску, Беларусь знаходзіцца ў Мытным Саюзе з Расеяй ды Казахстанам, а з 2015 году ўзьнікае яшчэ Эўразійскі эканамічны саюз, а таму трэба ствараць роўныя ўмовы для прадпрымальнікаў на ўсёй гэтай прасторы.

„Наступным крокам, каб палегчыць працу прадпрымальнікам, зьяўляецца прызнаньне нацыянальных сэртыфікатаў. То бок, калі я бяру на фабрыцы рэчы з іхным нацыянальным сэртыфікатам якасьці, то я не павінна ўжо тут, у Беларусі, яшчэ плаціць грошы і пацьвярджаць гэтую якасьць“, - кажа Ірына Яскевіч.

Праблема тычыцца абавязковай сэртыфікацыі ўвезеных у Беларусь зь першага ліпеня тавараў, у тым ліку з краін Мытнага саюзу. Ірына Яскевіч прыгадвае, што ўсе свае прапановы ІП накіравалі ўладам краіны, але адказу па-сутнасьці на ўсё свае пытаньні не атрымалі.

Радыё Рацыя