Віцебскія актывісты аргкамітэту па стварэньні партыі "Беларуская хрысьціянская дэмакратыя" Тацьцяна Севярынец і Алена Шабуня (на фота) перадалі ў Камітэт дзяржкантролю 945 подпісаў на 48 падпісных аркушах за будаўніцтва сьмецьцеперапрацоўчага камбінату. Подпісы былі сабраныя падчас мясцовай кампаніі: як падчас збору подпісаў, так і агітацыйнай кампаніі. Прымаў іх у КДК Віталь Сьцяпанаў, які ўсю размову з актывісткамі запісаў на дыктафон.

Спрабавалі прадстаўнікі БХД распавесьці пра сабраныя подпісы і ў газэце Віцебскага гарсавету "Віцьбічы", якая год таму пісала пра тое, што сьмецьцеперапрацоўчы камбінат будзе пабудаваны праз два гады, але будаўніцтва якога практычна так і не пачалося. Аднак у газэце пісаць пра гэта адмовіліся. Як і пра тое, што будаўніцтва сьмецьцеперапрацоўчага камбінату ў Віцебску, які мусіў бы быць адчынены яшчэ ў 2011 годзе, няма нават у плянах на 2014 год.

"Уладам трэба яшчэ раз падумаць над будаўніцтвам камбінату. Спадзяваньняў, праўда, на гэта мала, бо будаўніцтва вельмі дарагое, а выдаткаваныя раней на гэта сродкі зьніклі невядома куды", - адзначае каардынатар аргкамітэту БХД Тацьцяна Севярынец.

bchd.info