На 10 сьнежня ў Віцебску замоўлены пікет салідарнасьці з палітвязьнямі. Заяўку ў адміністрацыю Кастрычніцкага раёну горадe падаў старшыня гарадзкой арганізацыі партыі БНФ Аляксандр Кузьняцоў. Мэта мерапрыемства, як напісана ў заяўцы, - гэта “пратэст супраць палітычных рэпрэсіяў у краіне, акцыя салідарнасьці з палітвязьнямі і патрабаваньне іх неадкладнага вызваленьня і поўнай рэабілітацыі”.

Днямі мусіць прыйсьці адказ наконт падобнай акцыі з адміністрацыі Першамайскага раёну Віцебску. На 29 кастрычніка пікет салідарнасьці з палітвязьнямі замаўлялі каардынатар руху “За свабоду” па Віцебскай вобласьці Хрыстафор Жаляпаў і актывіст аргкамітэту па стварэньні сацыял-дэмакратычнай партыі “Народная Грамада” Аляксей Гаўруцікаў. Яны таксама хочуць зладзіць акцыю, каб прадэманстраваць салідарнасьць зь Мікалаем Статкевічам, Эдуардам Лобавым, Алесем Бяляцкім ды іншымі палітвязьнямі, патрабуючы іхнага вызваленьня.

Праваабарончы цэнтар “Вясна”