Ініцыятыўная група прэтэндэнта ў прэзыдэнты ад Лібэральна-дэмакратычнай партыі Беларусі Сяргея Гайдукевіча ўжо сабрала неабходныя для рэгістрацыі сто тысяч подпісаў выбарцаў, пра гэта «Віцебскай вясьне» заявіў лідэр абласной арганізацыі ЛДП Сяргей Ярмыкін.
Сяргей Уладзіміравіч, паведаміце, калі ласка, нашым чытачам, якую колькасьць подпісаў удалося сабраць сябрам вашай ініцыятыўнай групы на цяперашні момант.
Кампанія па зборы подпісаў у самым разгары. Наша абласная ініцыятыўная група даволі вялікая – 650 чалавек. На сёньняшні дзень па Віцебскай вобласьці сабралі больш за 14 тысяч подпісаў. Мяркуем урэшце здаць, як і плянавалі, каля 30 тысяч подпісаў.
На сёньняшні дзень ёсьць у нас і чатыры чалавекі, якія ўжо ушчыльную падышлі да мяжы ў тысячу подпісаў. Асноўная ж маса зьбірае ад пяцідзесяці да трохсот.
Скажыце, а як выглядае ў гэтай кампаніі Віцебскі рэгіён у параўнаньні зь іншымі рэгіёнамі краіны?
Вядома, у лідэрах Менск, але ж на тле іншых рэгіёнаў мы выглядаем няблага. Ёсьць рэгіёны, дзе сабралі больш, ёсьць, дзе – менш: Берасьце, Гародня. У нас жа цяжкавата ідзе збор подпісаў у раёнах: Дуброўне, Сянно, Талачыне, Бешанковічах, Шуміліне. Мала. Мала. Нешта, безумоўна, мы там зьбяром, але... У Полацку, Наваполацку таксама ідзе цяжкавата.
І ў чым Вы бачыце прычыны гэткага становішча?
Прычына у тым, што народ стаміўся. Многія папросту ня хочуць падпісвацца зусім, незалежна ад пэрсоны, іншыя падтрымліваюць існага прэзыдэнта.
У такім выпадку назавіце тыя месцы, дзе справа са зборам подпісаў ідзе лепей.
Віцебск, само сабой, у лідэрах. Таксама ў Воршы прыстойна зьбіраюць. Ворша і Аршанскі раён вельмі добра дадаюць да агульнай колькасьці. Я сам наведваў гэты рэгіён, вывучаў прычыны гэткіх посьпехаў. Рэч у тым, што яны шмат працуюць з працоўнымі калектывамі. Пасьля працы і ў перапынак на абед з дазволу кіраўніцтва нашы валянтэры прыходзяць да працоўных і тыя без праблемаў па ўласным жаданьні бяруць пашпарты і ставяць подпісы. Я вам скажу: выканаўчая улада ніякіх перашкод нам ня чыніць.
А ці маглі б Вы вызначыць, хто зьяўляецца асноўным падпісантам за вашага вылучэнца падчас пакватэрнага абыходу?
Пры пакватэрным зборы подпісаў асноўнымі падпісантамі зьяўляюцца людзі сталага веку – у бальшыні выпадкаў яны падпісваюць. Многія зь іх ужо ведаюць Сяргея Гайдукевіча, многім тлумачым, хто такі, чаму за яго варта падпісацца і навошта патрэбная альтэрнатыва на выбарах. Моладзь падпісваецца радзей, а калі і падпісваецца, падпісваецца ў асноўным неўсьвядомлена.
Падзяліцеся, чаму вы не выкарыстоўваеце гэткую форму збору подпісаў, як пікет?
Ад пікетаў па Віцебску і вобласьці мы адмовіліся. Бо гэта не эфэктыўна. У першыя дні я асабіста паназіраў за арганізаванымі ў горадзе пікетамі. На адным месцы пастаяў гадзіны тры, на другім – гадзіны дзьве, і зразумеў, што гэта некарысна. І я ня веру, калі прадстаўнікі іншых ініцыятыўных групаў кажуць, што за дзень ім удаецца сабраць трыццаць-шэсьцьдзесят подпісаў. Вось вам канкрэтны прыклад: сябра нашай партыі, які працуе на Чарняхоўцы ў банку, на свае вочы бачыў, што зборшчык подпісаў за аднаго з кандыдатаў за дзень сабраў толькі чатыры подпісы. Дарэчы, я ведаю, што за некаторых з кандыдатаў прыяжджаюць нават валянтэры зь Менску, бо на месцы няма каму зьбіраць. У нас такой практыкі няма.
Наколькі асоба Сяргея Гайдукевіча зьяўляецца пазнавальнай для электарату?
Прыяжджала да нас карэспандэнт з «Советской Белоруссии». Кажа: хачу прайсьціся разам з вашым валянтэрам. Мабыць, яна таксама задавалася гэткім самым пытаньнем. Зайшлі мы ў кватэру, адкрыла нам жанчына сталага веку, пэнсіянэрка. Кажа: «Заходзьце, калі ласка. Гарбаты нам прапанавала. Так, я ведаю, хто такі Гайдукевіч, гляджу тэлебачаньне. Давайце я вам падпішу. Ніякіх праблемаў».
Ці зьбіраецца Гайдукевіч, як іншыя кандыдаты, найбліжэйшым часам наведаць у Віцебску сваіх патэнцыйных прыхільнікаў?
Наведваць Віцебск ды іншыя буйныя гарады Беларусі Сяргей Гайдукевіч пакуль не зьбіраецца. На цяперашнім этапе гэта не мэтазгодна. Будзе рэгістрацыя, тады – абавязкова.
Як я бачу, Вы ніколькі не сумняваецеся, што Ваш кандыдат будзе зарэгістраваны.
Я думаю, праблемаў з рэгістрацыяй у нас ня будзе: на сёньняшні дзень па рэспубліцы сто тысяч подпісаў мы ўжо сабралі. Перабіраць лішку і дасягаць нейкай там загадзя пастаўленай плянкі няма ніякага сэнсу. Навошта? Ёсьць пэўная лічба, і гэтага дастаткова. Не, вядома, нейкі запас у 10-20 тысяч подпісаў мы зробім на ўсялякі выпадак. І ўсё. Дый сабраць сто тысяч подпісаў – гэта ня так і проста. Сьцьвярджаць адваротнае можа толькі той, хто ніколі іх не зьбіраў. Сто тысяч – гэта ня так і мала. Каб іх сабраць, абысьці трэба ня сто тысяч чалавек, а ў разы больш. Апроч таго, зь людзьмі трэба паразмаўляць. Гэта цэлая эпапэя. Таму будзем чакаць рэгістрацыі, пасьля якой і пачнецца асноўны этап працы.
С. Горкі, Віцебская вясна
