Як паведаміў старшыня камітэту па працы, занятасцi i сацыяльнай абароне Віцебскага аблвыканкаму Аляксандар Хрыстафораў, у якасьці беспрацоўных на цяперашні момант зарэгістраваныя 6 967 чалавек, або 200% да аналягічнага пэрыяду мінулага году. У той самы час у два разы скарацілася колькасьць вакансіяў, прапанаваных прадпрыемствамі, цяпер іх 2 505.
Пытаньні занятасьці насельніцтва абмяркоўваліся на пятнаццатай сэсіі абласнога Савету дэпутатаў 27-га скліканьня, бо ад іх вырашэньня наўпрост залежаць разьвіцьцё эканомікі вобласьці і дабрабыт яе жыхароў.
На Віцебшчыне сёньня пражывае 1 мільён 195 тысяч чалавек, зь іх 723 тысячы складаюць працоўныя рэсурсы вобласьці. Колькасьць занятага насельніцтва ў студзені – жніўні бягучага году ў параўнаньні з тым жа пэрыядам 2014-га зьнізілася на 2,3%.
«Прычын сытуацыі, якая склалася, некалькі, – растлумачыў Аляксандар Хрыстафораў. – За мінулы год прадпрыемствы Віцебшчыны ўклалі ў мадэрнізацыю сваіх вытворчасьцяў больш за 3 трыльёны рублёў, што зрабіла іх прадукцыю больш канкурэнтаздольнай, палепшыла ўмовы працы работнікаў. Але разам з тым новыя тэхналёгіі і сучаснае высокапрадукцыйнае абсталяваньне пацягнулі за сабой аптымізацыю. Для многіх вызваленых работнікаў арганізаванае перанавучаньне, хтосьці пайшоў на пэнсію, але ёсьць і тыя, хто адразу адправіўся на біржу працы».
На думку Аляксандра Христофорова, становішча пагоршыла тое, што вялікая колькасьць грамадзян, якія езьдзілі на заробкі ў Расею, вярнулася на радзіму, а таксама павялічылася колькасьць мігрантаў.
Намесьнік старшыні камітэту Ірына Матвеева адзначыла, што з канца 2014 году ў паўночным рэгіёне, як і ва ўсёй краіне, зьмяніліся тэндэнцыі на рынку працы.
Павялічылася колькасьць грамадзян, якія зьвярнуліся ў службу занятасьці па садзейнічаньне ў працаўладкаваньні: за 8 месяцаў 2015-га – на 24% больш, чымся за аналягічны пэрыяд 2014-га. Адной з прычын стаў дэкрэт прэзыдэнта Рэспублікі Беларусь ад 02.04.2015 №3 «Аб папярэджаньні сацыяльнага ўтрыманства». Грамадзяне, якія доўгі час афіцыйна нідзе не працавалі і не былі зарэгістраваныя ў якасьці беспрацоўных, далі асноўны рост колькасьці зваротаў – каля 23%.
Сёньня сярэднестатыстычны беспрацоўны – гэта мужчына ва ўзросьце 41 году, які мае прафэсійна-тэхнічную адукацыю.
«Бясспрэчна, такое становішча спраў шмат у чым тлумачыцца аптымізацыяй колькасьці работнікаў і эканамічнымі праблемамі на шэрагу прадпрыемстваў вобласьці. Аднак асобныя кіраўнікі дапускаюць вольнасьці ў прадстаўленьні вакансіяў у службу занятасьці», – сказала Ірына Віктараўна.
Праведзены маніторынг адпаведнасьці вакансіяў, зарэгістраваных у службе занятасьці, рэальнай іх наяўнасьці. З 300 правераных арганізацыяў у 23 зафіксаваныя парушэньні заканадаўства. Настойлівая пазыцыя органаў улады вобласьці, якія ўстанавілі за гэта пэрсанальную адказнасьць кіраўнікоў прадпрыемстваў, дала свае вынікі. Калі ў ранейшыя месяцы колькасьць вакансіяў няўхільна зьніжалася, то цяпер яна стабілізуецца. Найбольшая колькасьць вольных працоўных месцаў заяўленая прадпрыемствамі сельскай гаспадаркі (515), апрацоўчай прамысловасьці (496), аховы здароўя (239), гандлю (237).
Ірына Матвеева паведаміла, што больш за 60% ад агульнай колькасьці вакансіяў складаюць рабочыя прафэсіі. Пры гэтым патрэба ў высокакваліфікаваных спэцыялістах вырасла з 20 да 30%. Больш за ўсё запатрабаваныя швачкі, кіроўцы, прадаўцы, сьлесары розных профіляў. Сярод спэцыялістаў і служачых пастаянным попытам карыстаюцца інжынэры, мэдычныя сёстры, лекары. У сельскай мясцовасьці патрэбныя трактарысты, апэратары машыннага даеньня, жывёлаводы, ветлекары, заатэхнікі. З даваньнем жытла, як правіла, у сельскай мясцовасьці, прапануецца 140 вакансіяў. Вакансіі з заработнай платай вышэй за 4 мільёны рублёў складаюць 27%, 4-6 мільёнаў – 24%, звыш 6 мільёнаў – 3%.
Штогод распрацоўваюцца Дзяржаўная праграма садзейнічаньня занятасьці насельніцтва Рэспублікі Беларусь і мерапрыемствы па яе забесьпячэньні на Віцебшчыне. На іх рэалізацыю ў галіне накіравана амаль 25 мільярдаў рублёў.
Старшыня аблвыканкаму Мікалай Шарстнёў: «Тое, што сёньня скарачаецца колькасьць вакансіяў, кажа толькі пра тое, што людзі цэняць сваю працу. Так, сапраўды, спэцыялістам з рэдкай прафэсіяй складана знайсьці месца. Але ёсьць і тыя, хто проста ня хоча працаваць, нездарма ж прыняты закон пра дармаедзтва. Каб пракарміць сябе і сям'ю, знайсьці працу можна – была б ахвота».
Мікалай Мікалаевіч выказаў заклапочанасьць, што да працаўладкаваньня моладзі, бо маладому спэцыялісту бяз досьведу часьцяком вельмі складана знайсьці сабе працу. Гэта тая катэгорыя, якая павінна быць на кантролі ў кіраўнікоў раёнаў, падкрэсьліў кіраўнік вобласьці.
Апроч таго, на асобных прадпрыемствах ужо становяцца нормай няпоўны працоўны тыдзень, адпачынак з ініцыятывы наймальніка. А гэта, на думку Мікалая Шарстнёва, адбываецца з-за самазаспакоенасьці кіраўнікоў і няўменьня рэалізоўваць вырабленую прадукцыю. Каб такога пазьбегнуць, трэба дэталёва разабраць кожную сытуацыю, пераканацца, ці ўсе захады зробленыя, сказаў на заканчэньне старшыня аблвыканкаму.
Алена Алімава, vitvesti.by
