Віцэ-прэм’ер Пётар Пракаповіч расказаў прыватнаму бізнэсу пра яго задачы. Па-першае, у наступнай пяцігодцы забясьпечыць 50% валавага ўнутранага прадукту (цяпер гэта каля 20%). Па-другое, чыноўнік параіў прадпрымальнікам заняцца вытворчасьцю і гандляваць айчыннай прадукцыяй, а ня скардзіцца на новы тэхнічны рэглямэнт Мытнага саюзу адносна прадукцыі лёгкай прамысловасьці. Старшыня арганізацыйнай групы па стварэньні беларускага прафсаюзу “Разам” Ірына Яскевіч лічыць такія заявы чыноўніка пустымі.

- Калі мы нічога не вырабляем, то мы будзем гандляваць тым, што будзе прадавацца, бо няма ніякага сэнсу гандляваць тым, што немагчыма прадаць. Кожны павінен разумець, што нават зусім маленечкі бізнэс немагчыма прымусіць разгружаць склады той вытворчасьці, якая напрацавала на склад. І калі фірменныя крамы прадпрыемстваў без усіх нацэнак і надбавак ня могуць прадаць свой тавар, то як мы зможам яго прадаць, калі нам зробяць яшчэ базавую надбаўку на гэты тавар?

Адносна ВУП, Ірына Яскевіч кажа, што трэба зьмяняць заканадаўства, рабіць больш ільготнымі падаткі і гэтак далей. Каб бізнэс не заставаўся пустым словам.

Радыё Рацыя