У трох вёсках Віцебскага раёну - Ліпаўцы, Шапечына і Асінаўка - у насельніцтва канфіскавалі і зьнішчылі сьвіней, якія ўтрымліваліся ў асабістых прысядзібных гаспадарках. Матывуецца гэта нейкай эпідэміяй, але якой менавіта гаспадарам жывёл не паведамляецца.

У Шапечына, бачачы журналіста з камэрай, людзі хаваюць вочы і адмаўляюцца гаварыць. Атрымоўваецца пагутарыць толькі з адным хлопцам - ён пацьвердзіў, што 19 чэрвеня ў іх вёсцы канфіскавалі ўсіх сьвіней, пагрузілі іх у прычэпы трактароў і павезьлі ў невядомым кірунку. Насельніцтву параілі асабліва не распаўсюджвацца аб здарэньні, калі ня хочуць непрыемнасьцяў на працы.

У Асінаўку ліквідатары дабраліся на дзень пазьней, і частка гаспадароў пасьпела зарэзаць сваіх сьвіней. Але ў тых, хто не пасьпеў апрацаваць сьвежыну, сьвіныя тушы забіралі, канфіскоўвалі і разабранае мяса, калі знаходзілі яго ў доме. Як распавяла адна з жыхарак Асінаўкі, за некалькі дзён да гэтага падворкі абыходзіў старшыня сельсавету, які запісваў у каго колькі маецца сьвіней. Цяпер адбіраць жывёл прыехалі прадстаўнікі вэтэрынарнай службы ў суправаджэньні міліцыі. Забітых сьвіней ніхто не ўзважваў, нават мернай стужкі пры сабе ў ліквідацыйнай каманды не аказалася - вага жывёліны ў акт канфіскацыі запісвалася «на вока».

Журналістам удалося пагутарыць з дэзінфэктарамі, якія прыехалі апрацоўваць пабудовы, у якіх ўтрымліваліся сьвіньні. Яны сказалі, што ня ведаюць, чым былі хворыя жывёлы, проста атрымалі ўказаньне апрацаваць хлявы каўстычнай содай. Да гэтага, падчас канфіскацыі, памяшканьні апырскваліся хлёркай. Зрэшты, мець зносіны з прэсай гэтыя людзі відавочна не жадалі.

У той самы час, пасьля зьяўленьня інфармацыі пра канфіскацыю жывёл, у вёсцы Машканы Сеньненскага раёну, побач зь якой разьмешчаны буйны сьвінакомплекс, насельніцтва ў паніцы пачало масава забіваць асабістых сьвіней.

Народныя навіны Віцебска