Другі выпуск "Полацка-Віцебскай старыны", выдадзены ў 1912 годзе ў віцебскай друкарні Нэймана, прадаюць на расейскім электронным аўкцыёне за 430 даляраў. Кніга, мяркуючы па дадзеных прадаўца, знаходзіцца ў Маладэчне. Аўкцыён заканчваецца 21 чэрвеня. Мінімальны кошт лоту 14 000 расейскіх рублёў, а імгненна яго можна выкупіць за 15 000 расейскіх рублёў, што паводле сёньняшняга курсу складае каля 430 даляраў.

Другі выпуск "Полацка-Віцебскай старыны" выйшаў пад рэдакцыяй Клаўдзія Ціхамірава, які на той час быў дырэктарам Віцебскага настаўніцкага інстытуту і сябрам Віцебскай навуковай архіўнай камісіі.

Гэты том збольшага прысьвечаны падзеям вайны 1812 году на тэрыторыі Віцебскай губэрніі. Менавіта ў ім зьмешчаны матэрыял пра адкрыцьцё ў 1912 годзе віцебскага помніку героям гэтай вайны. Акрамя таго ў кнізе апублікаваныя вялікія матэрыялы пра езуітаў ва ўсходняй частцы Беларусі і полацкага князя Ўсяслава Чарадзея, нарыс пра Бешанковічы, каралеўскія прывілеі, выдадзеныя Віцебску.

tut.by