3 ліпеня каля 17:00 у Лепелі недалёка ад пляжу на Лепельскім возеры пяском засыпала 11-гадовага хлопчыка. Школьнік прыехаў на вакацыі да бабулі і разам з двума аднагодкамі пайшоў гуляцца на гарадзкі пляж. Дзеці выкапалі ў пяшчаным абрыве нару і залазілі туды. Раптам грунт абваліўся і цалкам засыпаў аднаго з хлопчыкаў.

Дзеці адчайна спрабавалі адкапаць свайго сябра, але гэта ім не ўдалося, пасьля чаго яны пабеглі па дапамогу да дарослых. Першым да абрыву прыбег супрацоўнік выратавальнага паста ОСВОД, ён і выцягнуў хлопчыка зь зямлі.

Прыехалі выкліканыя хуткая дапамога і МНС. Нягледзячы на ​​рэанімацыйныя захады, выратаваць жыцьцё школьніку не ўдалося, мэдыкі канстатавалі сьмерць дзіцяці. Матэрыялы праверкі па гэтым здарэньні ўжо перададзеныя ў раённы аддзел сьледчага камітэту, паведамляе прэс-служба УУС Віцебскага аблвыканкаму.

У чэрвені 2014 году ў Віцебскай вобласьці адбыліся два падобныя выпадкі: у Глыбоцкім раёне засыпала двух школьнікаў, а ў Альгове пад Віцебскам – аднаго. Ва ўсіх выпадках дзеці загінулі.

news.vitebsk.cc