Увечары 6 сакавіка на Чырвонаармейскай, 13 сабраліся дэмакратычныя актывісты для абмеркаваньня бягучых пытаньняў. Абмяркоўваўся і "Марш недармаедаў", заплянаваны ў Воршы на 12 сакавіка. Падчас абмеркаваньня ў дом зайшлі міліцыянты, якія папрасілі "пагутарыць з адказным за памяшканьне". Размаўляў зь міліцыянтамі рэдактар сайту orsha.eu Ігар Казьмярчак. Празь некаторы час да дома пад'ехалі прадстаўнікі Сьледчага камітэту з пастановай аб правядзеньні ператрусу.

Пастанову пра ператрус падпісаў пракурор раёну Белавусаў Ігар Вячаслававіч. У пастанове было напісана прыблізна наступнае: па вуліцы Камсамольскай у адным з банкаў была выяўленая 5-рублёвая фальшывая купюра, а таксама паступіла інфармацыя, што на Чырвонаармейскай, 13 маецца капіявальная тэхніка. Чамусьці сьледчыя правялі паміж гэтымі двума паведамленьнямі нейкую сувязь і вырашылі зладзіць ператрус ня тых капіявальных цэнтраў і прыватных друкарак, якія знаходзяцца бліжэй да вуліцы Камсамольскай, а рушылі менавіта на вуліцу Чырвонаармейскую.

Падчас ператрусу прысутных папрасілі пакінуць памяшканьне, але пры гэтым доўгі час не адпускалі дадому. У прыватнасьці, аршанская паэтка Яўгенія Казлова асобна зьвярнулася да міліцыянтаў з просьбай адпусьціць яе, спасылаючыся на стан здароўя. Міліцыянты яе не адпусьцілі, але сказалі, што выклічуць хуткую дапамогу, калі ёй раптам стане блага.

У выніку ператрусу ніякіх фальшывак, натуральна, знойдзена не было. Але ўся кампутарная і капіявальная тэхніка была канфіскаваная для правядзеньня экспэртызы. Забралі нават фарбу для друкаркі.

На цяперашні момант за памяшканьне, што належала мясцоваму актывісту Алесю Шутаву, які летась пайшоў з жыцьця, адказвае Ігар Казьмярчак, рэдактар orsha.eu, старшыня моладзевага грамадзкага аб'яднаньня "Зьвяз" і ўдзельнік Аршанскай кааліцыі дэмакратычных сіл. За два дні да гэтага Ігара затрымалі на мяжы, калі ён вяртаўся з Польшчы з тыднёвай паездкі, і правялі асабісты дагляд, прычым тады мытнікі вусна патлумачылі, што "перашук – не іх ініцыятыва".

І той, і гэты перашукі актывіст зьвязвае з акцыяй пратэсту супраць дэкрэту № 3 пра дармаедзтва, які заплянаваны ў Воршы на 12 сакавіка. Гэты пратэст павінен стаць першай публічнай масавай акцыяй у горадзе за апошнія 16 гадоў.

Цяперашні ператрус – першы за апошнія 7 гадоў акт сур'ёзнага ціску на дэмакратычных актывістаў Воршы. Прычым і сем гадоў таму гэты ціск адбывалася ў выглядзе ператрусу ў Ігара Казьмерчака, але тады гэта была прыватная кватэра. Тады таксама быў "адпраўлены на экспэртызу" асабісты кампутар Ігара.

orsha.eu