Адміністрацыя спэцкамендатуры ў вёсцы Куплін Пружанскага раёну (папраўчай установы адкрытага тыпу) нарэшце прыняла ў дар ад палітзьняволенага Паўла Севярынца бойлер. Яго ў самы пачатку знаходжаньня Севярынца ў спэцкамэндатуры прывезьлі сябры БХД з Кобрыну. Але тады адміністрацыя адмовілася прыняць: маўляў, шмат дакумэнтацыі патрэбна аформіць.

Аднак Севярынец упэўнены, што не ўзялі толькі таму, што ад апазыцыі ў дар нават гарачай вады ня трэба. Паводле слоў Паўла, устаноўка больш як 200-літровага якаснага нарвэскага бойлеру вырашыла б даўно праблему адсутнасьці гарачай вады ў спэцкамендатуры.

“Колькі ўжо гадоў адсутнасьць душавой была галоўнай напругай для куплінскай “хіміі”. З часоў пакінутага савецкага вайсковага гарадка вада халодная і іржавая, якую піць не магчыма. Дай Бог, каб дайшло да ладу. Як жа гэта, каб паўсотні мужыкоў дый без гарачай вады”, - кажа Павал Севярынец. Павал Севярынец лічыць, што далей патрэбная карэнная замена ўсёй структуры адбываньня пакараньня ў такіх установах.

Праваабарончы цэнтар “Вясна”