На сайце «Хроніка Туркмэністану» зьявілася нататка «Туркмэнскія студэнты просяць ратунку», дзе паведамляецца, што на студэнтаў з Туркмэністану, што навучаюцца ў Віцебскім дзяржаўным унівэрсытэце імя П. М. Машэрава, на працягу апошніх двух тыдняў палююць мясцовыя скінхэды. Далей у тэксьце гаворыцца наступнае: «Групы маладых хлопцаў зьбіваюць як хлопцаў, гэтак і дзяўчат - туркмэнскіх студэнтаў. З-за таго, што апошнія цяпер не могуць выйсьці на вуліцу, ужо на працягу шасьці дзён навучальны працэс ва ўнівэрсытэце спынены».

Міжведамасная працоўная група Віцебскага абласнога камітэту прыродных рэсурсаў і аховы навакольнага асяродзьдзя зафіксавала шматлікія парушэньні экалягічнага заканадаўства на тэрыторыі Гарадоцкага раёну. Кіраўнікам прадпрыемстваў ААТ «Гарадоцкі райаграпрамзаб», ААТ «Гарадоцкі льнозавод», КУП «Гарадоцкі ПКіЦС» накіраваныя прадпісаньні аб устараненьні парушэньняў.

Апошнюю адмову ад адміністрацыі Першамайскага раёну Віцебску атрымалі Аляксей Гаўруцікаў і Хрыстафор Жаляпаў. 29 кастрычніка яны хацелі правесьці пікет салідарнасьці з палітвязьнямі. Каардынатар руху “За свабоду” па Віцебскай вобласьці Хрыстафор Жаляпаў і актывіст аргкамітэту па стварэньні сацыял-дэмакратычнай партыі “Народная Грамада” Аляксей Гаўруцікаў падрыхтавалі заяўку такім чынам, каб у раённых уладаў было найменей падставаў адмовіць.

Каардынатарка аргкамітэту па стварэньні партыі “Беларуская хрысьціянская дэмакратыя” па Віцебску Тацьцяна Севярынец перадала Віцебскаму дому-інтэрнату для састарэлых і інвалідаў 60 кніг. Паводле яе словаў, раней актывісты БХД ужо перадавалі інтэрнату кнігі, перадусім клясычную літаратуру, і выхаванцы папрасілі больш звычайнага чытва, што і зрабіла зараз Тацьцяна Севярынец.

Вечарынка плянавалася ў віцебскім клюбе “Зэбра” 24 кастрычніка, у дзень незалежнасьці Туркмэністану. Рашэньне адмяніць мерапрыемства адміністрацыяй клюбу было прынятае з прычыны масавай незадаволенасьці інтэрнэт-карыстальнікаў. Вось што распавялі ў клюбе: “Імпрэза адмененая. Прычына адмены — масавая незадаволенасьць у інтэрнэце. Вельмі масавая. Таму, каб пазьбегнуць інцыдэнтаў, мы вырашылі адмяніць імпрэзу”.