Алесь Бяляцкі выйшаў на свабоду. Кіраўнік праваабарончага цэнтру «Вясна» патэлефанаваў жонцы Натальлі Пінчук і паведаміў, што ён вызвалены і едзе ў Менск на электрычцы з Бабруйску. Да канца яго тэрміну заставалася яшчэ больш за паўтара году, але Бяляцкага нечакана выпусьцілі па амністыі.

Колькасьць замежнікаў, якія імкнуцца атрымаць у Віцебскай вобласьці статус уцекача, штогод павялічваецца. Пра гэта паведаміла на паседжаньні круглага стала па абмеркаваньні новага праекту Беларускага таварыства Чырвонага Крыжа (БТЧК) "Аднаўленьне сямейных сувязяў" галоўны спэцыяліст групы зьнешняй працоўнай міграцыі ўцекачоў ўпраўленьня па грамадзянстве і міграцыі УУС Віцебскага аблвыканкаму Вольга Лазарава.

У Віцебскай вобласьці для ўдзелу ў цэнтралізаваным тэставаньні зарэгістраваліся 31 тыс. 331 чалавек, паведамілі ў абласной камісіі па кантролі за ходам падрыхтоўкі і правядзеньня ўступных выпрабаваньняў ва ўстановах вышэйшай і сярэдняй спэцыяльнай адукацыі.

Чатыры дзясяткі жыхароў Глыбокага падпісаліся пад калектыўным лістом у Савет Міністраў, дзе выкладзеная просьба аб ініцыяваньні звароту ў Канстытуцыйны суд з мэтай ацэнкі рашэньня Глыбоцкага райвыканкаму №167 "Аб вызначэньні месцаў для правядзеньня мітынгаў і пікетаваньняў" на адпаведнасьць Асноўнаму закону.

«Нафтан», «Веста» і «Полацактранснафта Дружба» сталі самымі прыбытковымі па выніках 2013 году сярод ААТ, якія працуюць на Віцебшчыне. Паводле інфармацыі Міністэрства фінансаў Рэспублікі Беларусь, у лік лідэраў увайшлі таксама вытворцы малочных прадуктаў, прамысловыя прадпрыемствы і адзін прадстаўнік аграрнага сэктару.