Органы пракуратуры Віцебскай вобласьці робяць захады дзеля спыненьня фактаў несвоечасовай выплаты работнікам заработнай платы. За затрымкі заробкаў супрацоўнікі пракуратуры прыцягнулі да адміністрацыйнай адказнасьці 250 службовых асоб.

Паводле статыстычных дадзеных, па стане на 1 верасьня 2016 году запазычанасьць па заработнай плаце мелася больш як у 100 арганізацыяў Віцебскай вобласьці.

“За дзевяць месяцаў бягучага году пракурорамі гарадоў і раёнаў, Віцебскім і Аршанскім транспартнымі пракурорамі ўнесенае 51 прадстаўленьне, вынесеныя 124 прадпісаньні, абвешчаныя 34 афіцыйныя папярэджаньні. Па выніках разгляду актаў пракурорскага нагляду да дысцыплінарнай адказнасьці прыцягнутыя 84 асобы”, – паведамілі ў генпракуратуры. Акрамя таго, пастановамі горрайпракурораў па справах аб адміністрацыйных правапарушэньнях 250 службовых асоб прыцягнутыя да адміністрацыйнай адказнасьці за нявыплату своечасова заработнай платы работнікам.

У ходзе выкананьня прадпісаньняў запазычанасьць пагашаная ў суме больш за 764 тысяч рублёў. Па фактах парушэньняў заканадаўства аб працы, выяўленых падчас разгляду зваротаў грамадзян, пракурорамі прымаюцца адпаведныя меры рэагаваньня ў мэтах ліквідацыі парушэньняў, прычын і ўмоў, якія ім спрыяюць.

Меры пракурорскага рэагаваньня спрыялі памяншэньню колькасьці фактаў несвоечасовай выплаты заработнай платы, сказалі ў генпракуратуры.

Паводле sputnik.by