Адзін з ключавых грамадзкіх дзяячоў Аршаншчыны памёр у шпіталі ўвечары 4 кастрычніка. Разьвітаньне з Алесем Шутавым адбудзецца у пятніцу, 7 кастрычніка, у рытуальнай залі за паліклінікай імя Сямашкі (Ворша, вуліца Астроўскага, д.18-А). Падыходзіць можна з 9:00.

Алесь Шутаў далучыўся да грамадзкай дзейнасьці, калі яшчэ быў студэнтам хімфаку БДУ – тады ён увайшоў у склад БНФ «Адраджэньне». Прыканцы 90-х Алесь стаў адным з заснавальнікаў шэрагу моладзевых грамадзкіх арганізацыяў, у тым ліку аршанскага «Зьвязу», які і цяпер застаецца адзінай зарэгістраванай моладзевай грамадзкай арганізацыяй у рэгіёне і які зьяўляецца альтэрнатывай праўладным арганізацыям.

Далучыўся Алесь Шутаў і да стварэньня сайту Vorša.eu – менавіта ён дамаўляўся пра тэхнічную частку яго стварэньня. І доўгі час быў яго рэдактарам.

Алесь Шутаў актыўна ўдзельнічаў у палітычным жыцьці Аршаншчыны: шмат гадоў узначальваў Аршанскую арганізацыю БНФ і прадстаўляў рэгіён у Сойме партыі, апошнія гады зьяўляўся актывістам кампаніі «Гавары праўду».

На мінулым тыдні Алесь Шутаў зьвярнуўся да лекараў, якія дыягнаставалі ў яго пнэўманію, давялося легчы ў шпіталь. Лекаваньне ішло як сьлед, і яшчэ ў аўторак Алесь быў бадзёрым, жартаваў, размаўляў пра працяг працы, вырашаў бягучыя пытаньні і плянаваў дзейнасьць на найбліжэйшыя тыдні.

Аднак позьнім вечарам 4 кастрычніка родныя Алеся Шутава паведамілі пра яго сьмерць.

Паводле vicebskreg.by