Свае ўражаньні ад наведваньня Віцебскага інфэкцыйнага шпіталя апісала на старонцы «Укантакце» адна з пацыентак: «Выклікалі хуткую - у дзіцяці тэмпэратура 39.5°. Ехала яна 2 гадзіны, забралі нас у інфэкцыйную больніцу, пра якую шмат чула. Паўтаруся, у дзіцяці тэмпэратура 39.5, а ў палаце +10, коўдры варушацца ад ветру, каля акна стаяць невыносна. Адчуваньне, што рамонту не было з самага адкрыцьця гэтай больніцы», - піша жанчына.

У камэнтарах пад гэтым запісам іншыя жыхары Віцебску пацьвярджаюць, што стан палат ў гэтым шпіталі - «поўны шок».

«Мая дачка ляжала там двойчы зь перапынкам у пяць гадоў. І вось за пяць гадоў ніякіх зьменаў у лепшы бок. Палаты, як у фільмах жахаў, а боксы наогул нагадваюць казематы. Антысанітарыя, прусакі, панцырныя сеткі да падлогі. Увогуле, неапісальна жудасна», - напісала Ірына Лукашова.

«Паскудны шпіталь. Там дарослым ляжаць немагчыма, а пра дзяцей ня можа быць і мовы. Ніякіх умоў, халодна вельмі. Патрапіш у інфэкцыйку з адной хваробай, а выйдзеш зь іншай », - пракамэнтавала Лена Сабурава.

Цікава, што пры канцы студзеня ў шпіталі адкрылі новы корпус. Аднак пацыентаў па-ранейшаму засяляюць у старыя палаты.

Галоўная мэдсястра Віцебскай інфэкцыйнай больніцы Раіса Раманцова пацьвердзіла, што «ўмовы ў палатах не ідэальныя»: «У нас старыя вокны, гэта так. Трохі прадзімае. Але тэмпэратура ў нас вышэй за 10 градусаў. Неўзабаве пераедзем у новы корпус, там цёпла будзе», - адказала мэдсястра.

На пытаньне, чаму пасьля адкрыцьця гэты самы новы корпус не засяляюць хворымі, мэдсястра адказаць не змагла. «Гэта праблемы больніцы, - сказала яна. - Калі каму-небудзь штосьці не падабаецца, хай піша ў вышэйстаячыя інстанцыі, гэтага ніхто не забараняе».

charter97.org