Чарговым домам, жыхары якога адмовіліся ад паслуг камунальнага прыбіраньня сваіх пад'ездаў работнікамі ЖРЭТу, стаў дом №17 па вуліцы Люднікава. Флягманамі гэтай ініцыятывы сталі грамадзяне, што пражываюць у пад'езьдзе нумар чатыры, якія хочуць ператварыць яго ў «пад'езд узорнага парадку».
Адмова ад прыборкі пад'ездаў сіламі камунальнікаў была выкліканая скачком кошту паслуг у жыроўках грамадзян на пачатку 2016 году. Нават наступны перагляд мэтодыкі налічэньня аплаты за прыбіраньне, у выніку якога адбылося скарачэньне яе памеру, не зьмяніў рашэньня пра самастойнае прыбіраньне пад'ездаў, прынятага на агульным сходзе жыхароў большасьцю галасоў.
Як патлумачыў работнік мясцовага домакіраўніцтва Ўладзімер, прычынай адмовы ад цэнтралізаванага прыбіраньня стала не толькі падвышэньне тарыфаў. Некаторых, напрыклад, не задавальняў існуючы графік прыбіраньня пад'ездаў і лесьвіц, у адпаведнасьці зь якім буйныя фрагмэнты сьмецьця прыбіраліся два разы на тыдзень, а вільготная прыборка рабілася два разы на месяц. Гэта задавальняла не ўсіх – і цяпер людзі прыбіраюць самі.
За апошнія два месяцы ў пад'езьдзе №4 намаганьнямі грамадзян пакладзена падлогавая плітка на месцах лесьвічных пляцовак, якія патрабуюць рамонту, пафарбаваныя ліштвы, зьявілася каляровая аблямоўка на лесьвічных пралётах і пляцоўках. Пафарбавалі і прыступкі на ўваходзе, і века сьмецьцязборнікаў. Пасьля таго як адмылі брудныя сьцены, на іх намалявалі кветкі, а на вокнах павесілі фіранкі.
Паводле слоў работніка домакіраўніцтва, гэта добра, калі жыхары самі адказваюць за прыбіраньне пад'ездаў. Менш сьмецяць, ды і якасьць прыборкі лепшая. На дзьвярох блёкаў вісяць графікі прыбіраньня лесьвічных пралётаў і лесьвічных пляцовак жыхарамі кватэр, якія знаходзяцца там. Аднак, нягледзячы на ініцыятыву, якая зыходзіць ад жыхароў, пад графікамі прыбіраньня чамусьці дагэтуль стаіць спасылка на адміністрацыю ЖЭУ №2. Кажа: «Так трэба».
Нягледзячы на тое, што ў зьмене аблічча пад'езду №4 удзельнічаюць некалькі жыхароў, асноўная ініцыятыва зыходзіць ад Людмілы Людзкай. Яна і грошы зьбярэ на куплю фарбы або замены вышчарбленай пліткі, яна, калі трэба, і сваёй асабістай фарбы не пашкадуе, каб надаць сьвежасьці старым паштовым скрыням, батарэям ацяпленьня, парэнчам або кратам. Спрацоўваюць набытыя прафэсійныя навыкі і любоў да чысьціні і парадку. У гэтым выпадку яна адначасова выступае ў дзьвюх гіпастасях: як працаўніца домакіраўніцтва і як ўладальніца адной з кватэр у пад'езьдзе. Менавіта дзякуючы яе намаганьням пад'езд мяняе свой выгляд і неўзабаве можа стаць «пад'ездам ўзорнага парадку».
Прыклад, калі жыхары шматпавярховікаў бяруць ініцыятыву ў свае рукі, у горадзе не адзінкавы, але зьявілася і зваротная тэндэнцыя: жыхары некаторых пад'ездаў хочуць ізноў перадаць функцыю прпыбіраньня работнікам домакіраўніцтва. Бо часам ня так проста знайсьці паразуменьне паміж усім жыхарамі. Ня ўсе зь іх аднолькава адказныя, з-за чаго і ўзьнікаюць канфлікты. У такіх выпадках, выходзіць, прасьцей заплаціць.
С. Горкі
