Сьледчы камітэт завяршыў расьсьледаваньне крымінальнай справы, распачатай у дачыненьні службовых асобаў зь Віцебскага абласнога клінічнага цэнтру псыхіятрыі і наркалёгіі. Сьледзтва высьветліла, што 40-гадовы галоўны бухгальтар установы і 38-гадовы вядучы бухгальтар увайшлі ў змову з начальнікам плянава-эканамічнага аддзелу і скралі каля 2 мільярдаў рублёў.

Жанчыны распрацавалі такую злачынную схему, якая дазваляла ім залічваць грошы з абласнога бюджэту і з пазабюджэтных сродкаў сабе на карткі. Па месцы жыхарства ў фігурантак справы правялі ператрусы, падчас якіх знайшлі каштоўнасьці, у тым ліку шматлікія ювэлірныя вырабы.

Абвінавачаныя пасьпелі кампэнсаваць страты на суму 1,3 мільярду рублёў. Усім чальцам злачыннай групы выставілі абвінавачаньне адразу паводле трох артыкулаў, паведамляе сайт Сьледчага камітэту.

euroradio.fm