У вёсцы Германавічы, што ў Шаркоўшчынскім раёне, 27 ліпеня прайшло народнае гуляньне «бульбяны фэст». Выглядала гэтае мерапрыемства як сьвята, арганізаванае самімі мясцовымі жыхарамі для сябе і гасьцей. Народнае сьвята праходзіла ў двары звычайнай вясковай хаты, у якой знаходзіцца прыватны культурна-асьветніцкі цэнтар імя Язэпа Драздовіча, створаны шчырай беларускай, пэнсіянэркай Адай Райчонак.

Гуляньне пачалося аб 11-й гадзіне. Прысутнічала каля 50 жыхароў Германавіч і гасьцей зь Віцебску, Полацку, Глыбокага, Лепеля, Менску. Удзельнікаў частавалі традыцыйнымі бульбянымі стравамі і мясцовымі напоямі, у вырабе якіх выкарыстоўваецца бульба.

Арганізатары распавядалі пра гісторыю Беларусі, пра зараджэньне традыцыі вырошчваньня бульбы ў Беларусі і іншых краінах сьвету. Былі конкурсы з прызамі, выступы музыкаў зь песьнямі і сумеснымі беларускімі танцамі. Песьні на беларускай мове выконвалі барды Георгі Станкевіч і Тацьцяна Матафонава.

Традыцыйныя беларускія дранікі гатаваліся наўпрост у двары на вачох ва ўдзельнікаў сьвята і доўга не залежваліся на талерках. Краязнаўца Ада Райчонак адзначыла, што хоць бульба і зьяўляецца нашым нацыянальным прадуктам, але такое сьвята ладзіцца ўпершыню, магчыма і ва ўсёй Беларусі. Яна выказала надзею, што фэстываль у Германавічах стане традыцыйным.

 Віцебская вясна