Яшчэ памятныя прэзыдэнцкія выбары-2010, а многія партыйныя лідэры Беларусі ўжо адкрыта заяўляюць пра выбары кіраўніка дзяржавы ў 2015 годзе. Ня так даўно прайшлі парлямэнцкія выбары, распачынаецца падрыхтоўка па вылучэньні кандыдатаў у мясцовыя Саветы. І хаця дакладна вядома, што ў Беларусі, пачынаючы з 1996 году, ніякіх выбараў няма, але многія палітыкі ўсё адно табуном ірвуцца на Алімп улады, нягледзячы на гузакі ад тых самых грабляў.

Праўда, экс-кандыдату ў прэзыдэнты, старшыні Лібэральна-дэмакратычнай партыі Сяргею Гайдукевічу не прыйшлося падзяляць лёс з такімі ж «эксамі»: ён прадбачліва зьняў сваю кандыдатуру з гонкі. Аднак на прэзыдэнцкія выбары-2015 ужо пачаў «тачыць штыкі». Натуральна, з дапамогай сваёй 45-тысячнай партыі. А гэта вам не дзіцячыя цацкі: дрыжэце, уладаносцы!

Наша сёньняшняя гутарка са старшынём Віцебскай абласной арганізацыі ЛДП Сяргеем Уладзімеравічам Ярмыкіным.

Скажыце, калі ласка, якая колькасьць вашай партыі на Віцебшчыне?

Больш за дзевяць тысяч, а калі дакладней, 9142 сябры.

А колькі ж «байцоў» плянуеце выставіць на маючыя адбыцца выбары ў мясцовыя Саветы?

На сёньняшні дзень імкнемся ўсё запоўніць: 60 месцаў абласнога Савета, 40 месцаў - Віцебскага гарадзкога.

Хто ж вам разьмеркаваў гэтыя «фатэлі»?

Самі разьмяркоўваем: змагацца-то трэба.

Але барацьба павінна быць на роўных умовах для ўсіх, ня такая, як цяпер.

Нічога страшнага. У рэшце рэшт, яна дае свой плён.

Якія ж вынікі вашай барацьбы?

Наш дэпутат у Глыбоцкім раённым Савеце.

Нягуста!

Усё адно трэба змагацца.

Зь якімі партыямі гатовыя супрацоўнічаць?

З усімі, хто ня толькі ў інтэрнэце плёскаецца і з-за бугра грабе гранты, а ў сапраўднасьці хаця б штосьці робіць, каб захаваць суверэнітэт Беларусі і не дапусьціць раскраданьне краіны. Партыя не павінна быць карлікавай.

Зь якой мэтай Вы займаецеся палітыкай?

У першую чаргу, каб дапамагчы народу. А гэта значыць, падымаць эканоміку краіны. Трэба на ключавыя пасады ставіць маладых адукаваных спэцыялістаў.

Таму барацьба і яшчэ раз барацьба.

А ў турму не баіцеся трапіць, бо прыкладаў з гэтай нагоды звышдастаткова?!

Туды можа трапіць кожны чалавек. Але мы не заклікаем да зброі, а паказваем на справе, як трэба кіраваць краінай і мець зносіны з народам.

Да прыкладу, адбываецца рэспубліканскі суботнік, мы выйшлі і пасадзілі 150 дрэў. Удзельнічаем у спартовых мерапрыемствах. Абласная арганізацыя ўзнагароджаная шматлікімі дыплёмамі. Дарэчы, у дзяржструктурах працуе нямала прадстаўнікоў нашай партыі.

Ці прызнаяце Вы легітымнасьць цяперашняй улады і Канстытуцыю 1996 году?

На гэткія пытаньні не хацелася б адказваць, бо вы не ва ўладзе. А ўладу трэба ацэньваць цьвяроза і правільна. Для гэтага трэба нешта рабіць у гэтай дзяржаве, каб разумець, як яна працуе. Пакуль яна на сваім месцы.

Выбачайце, я задаў канкрэтнае пытаньне. Бо вы ж ведаеце, што ў 1996 годзе адбыўся антыканстытуцыйны пераварот.

Упершыню чую.

Тады гэткае пытаньне. Што ваш лідэр павінен будзе зрабіць у першую чаргу, прыйшоўшы да ўлады?

Па-першае, Сяргей Васільевіч Гайдукевіч вельмі моцны канкурэнт Аляксандру Рыгоравічу. Па-другое, гэтае пытаньне, напэўна, мэтазгодней задаць яму самому. Магу зараз патэлефанаваць у Менск, пагутарыце.

Тэлефануем Сергею Гайдукевічу:

Сяргей Васільевіч, калі Вы станеце прэзыдэнтам Беларусі, якія будуць Вашы першыя крокі на пасадзе?

Адразу ж трэба памяняць Канстытуцыю, вярнуць яе ў прававое поле. Прэзыдэнт не павінен абірацца больш як на два тэрміны.

Дзякую за палітычную сталасьць.

Дазвольце Вам падзякаваць, Сяргей Уладзімеравіч, за інтэрвію і пажадаць посьпехаў на карысьць нашай з вамі Беларусі.

Гутарыў Уладзімер Жыгулоў