Сяргей Серабро і Алена Сьцяпанава ў адзін дзень атрымалі аднолькавыя лісты з загалоўкам “Ведай, куды язык можа давесьці”. Нехта, падпісаўшыся імем Яўген Мішакоў, крытыкуе інфармацыйную палітыку “Радыё Свабода” і “БелаПАН” і зьневажае незалежных журналістаў. Праўда, у тэксьце ліста імёны не называюцца, але намеры аўтара, які даслаў лісты на канкрэтныя адрасы, сумненьняў не выклікаюць.

Незалежныя журналісты разьмясьцілі атрыманыя лісты на сваіх старонках у Фэйсбуку. Сяржук Серабро запытаўся ў калег, ці не атрымлівалі яны чагосьці падобнага. Але пакуль адрасатаў у невядомага “дабразычліўцы” было ўсяго два.

Алена Сьцяпанава распавяла пра атрыманы ліст наступнае: “Подпіс, найхутчэй, выдуманы. І зваротны адрас заведзены, імаверна, для “разавай адпраўкі”. Прынамсі, я запыталася ў гэтага Яўгена Мішакова, ці ня блытае ён чагосьці, але адказу не атрымала. У самім лісьце – нейкія натужныя спробы гіранізаваць з таго, што журналісты пішуць крытычныя тэксты пра беларускую рэчаіснасьць. Маўляў, матэрыялы неаб’ектыўныя, і гэта выкананьне “замоваў”, а таксама спробы зарабіць сабе танную папулярнасьць і імя ў журналістыцы. Маўляў, “акулы пяра” і “кіты мікрафону” дзейнічаюць амаральна, шукаючы скандалаў у пошуках вялікіх ганарараў і славы… Між тым гэты Яўген Мішакоў піша пра нейкія падзеі, да якіх мы, мясцовыя журналісты, займаючыся тутэйшымі праблемамі, нават не зьвяртаемся – пра адносіны Беларусі з Вэнэцуэляй, пра візыты кіраўнікоў дзяржаў адно да аднаго… Але напрыканцы ліста – відавочныя пагрозы, накшталт таго, што праз ваш доўгі язык можаце трапіць у “месцы не такія аддаленыя”…”

У апошнім абзацы ліста незалежным журналістам “нагадваюць” пра існаваньне Закону “Аб асновах дзейнасьці па прафіляктыцы правапарушэньняў”, хаця незразумела, якое дачыненьне да яго маюць прадстаўнікі гэтае прафэсіі. А таксама страшаць артыкуламі з Крымінальнага кодэксу за “дыскрэдытацыю Рэспублікі Беларусь” і “заклікі да дзеяньняў, накіраваных на шкоду зьнешняй бясьпецы Рэспублікі Беларусь, яе сувэрэнітэту, тэрытарыяльнай недатыкальнасьці, нацыянальнай бясьпецы і абароназдольнасьці”.

Нагадаем, у Алены Сьцяпанавай і Сяргея Серабро колькі год таму праводзілі ператрусы, ім дасылалі артыкулы зь мясцовай газэты “Віцьбічы”, дзе ў зьняважлівым тоне пісалі пра сябра КХП БНФ Сяргея Каваленку, які вывесіў сьцяг на навагодняй ёлцы, і пра тое, што незалежныя журналісты няправільна асьвятляюць гэты ўчынак… Сяргея Серабро, рэдактара сайту “Народныя навіны Віцебска”, іншым разам не пускаюць з фотаапаратам на гарадзкія мерапрыемствы. Супраць Алены Сьцяпанавай тры тыдні таму міліцыянты ініцыявалі адміністрацыйную справу нібыта за парушэньне заканадаўства аб СМІ, але Кастрычніцкі райсуд не прыняў яе да разгляду.

Праваабарончы цэнтар “Вясна”