Апазыцыянэр Барыс Хамайда зьяўляецца, бадай, ці ня самай знанай асобай у Віцебску. Вось ўжо больш як два дзясяткі гадоў ён амаль штодня выходзіць у цэнтар гораду да т.зв. Сіняга дому, каб прапагандаваць ідэі беларускага нацыянальнага адраджэньня і распаўсюджваць незалежную прэсу. За гэты час зьмянілася мноства кіраўнікоў вобласьці і гораду, а Барыс Ханонавіч усё стаіць на сваім месцы.

Напярэдадні Дня Волі мы папрасілі вядомага віцебчука падзяліцца з нашымі чытачамі сваімі думкамі наконт гэтага сьвята.

– Што для мяне асабіста значыць 25 сакавіка? Гэта – найвялікшае сьвята! Не было такога году, каб я ў гэты дзень ня выйшаў. І зараз, я лічу, трэба выйсьці 25-га, трэба павіншаваць усіх людзей.

Для краіны гэта ўвогуле рэвалюцыйнае сьвята. У 1918 годзе найлепшыя беларусы змаглі абвясьціць Беларускую Народную Рэспубліку. Вядома, у той час не пашанцавала, але мы памятаем гэта ўсё, мы памятаем людзей, якія стаялі на пачатку гэтага гістарычнага працэсу. І я лічу, што задача нашай моладзі – каб усё ж такі Беларуская Народная Рэспубліка адбылася.