Аляксандар Лукашэнка патрабуе жорстка выконваць тэрміны мадэрнізацыі дрэваапрацоўчых прадпрыемстваў. Аб гэтым кіраўнік дзяржавы заявіў 14 сьнежня, наведваючы ААТ “Віцебскдрэў”. “Вы павінны працаваць, як у ваенны час. Я вам даў выразны сыгнал, больш таго, узяў на сябе вялікую адказнасьць, падпісаўшы адпаведны дэкрэт, за што мяне малоцяць, пачынаючы ад Амэрыкі і заканчваючы Расеяй. Таму я нікому не дарую. Працаваць вы павінны дзень і ноч”, - заявіў Аляксандар Лукашэнка.

“Прыйшоў час напружвацца. Таму тэрміны нават не падвяргайце сумневу”, - падкрэсьліў прэзыдэнт.

У час наведваньня ААТ “Віцебскдрэў” Аляксандру Лукашэнку далажылі аб мадэрнізацыі прадпрыемства і рэалізацыі інвэстпраекту па арганізацыі вытворчасьці драўнянавалакністых пліт МДФ/ХДФ. Як далажылі кіраўніку дзяржавы, асноўная прычына правалу тэрмінаў рэалізацыі інвэстпраекту - гэта віна будаўнікоў, якія не забясьпечылі належных тэмпаў работ. “Гэта мінус для вас, што вы не прымусілі іх працаваць як належыць. Трэба было выхопліваць гэтыя аб’ёмы”, - адзначыў Аляксандар Лукашэнка.

БелТА