У Віцебску затрыманыя сябры партыі БНФ — цяперашні старшыня абласной арганізацыі Леанід Аўтухоў і былы кіраўнік гэтай структуры Кастусь Смолікаў. У гандлёвым цэнтры «Эвіком» яны раздавалі ўлёткі з запрашэньнем на мітынг 25 сакавіка. Цяпер актывісты знаходзяцца ў ізалятары часовага ўтрыманьня, суд над імі адбудзецца 25 сакавіка.

На Ўсьпенскай горцы, на плошчы каля Сьвята-Ўсьпенскага катэдральнага сабору, рыхтуюць да ўстаноўкі помнік былому патрыярху Маскоўскаму і ўсяе Русі Аляксію II. Цяпер працоўныя віцебскага будтрэсту №9 рыхтуюць пляцоўку для падмурку будучага манумэнту.

Віцебскія актывісты ўжо каторы раз спрабавалі выканаць рашэньне гарвыканкаму “Аб правядзеньні масавых мерапрыемствах у г. Віцебску”. Згодна зь ім, заяўнікі масавых акцыяў мусяць заключыць дамовы на абслугоўваньне з ЖКГ, паліклінікай і міліцыяй. Але гэтыя структуры адмаўляюцца супрацоўнічаць з апазыцыянерамі, і Кастрычніцкі райсуд пацьвердзіў: рашэньне гарвыканкаму дазваляе дзяржаўным структурам ухіляцца ад дамоваў.

Беларусы далучаюцца да грамадзянскай акцыі. Жаданьне перапісваць фрагмэнты Бібліі ад рукі выказваюць жыхары розных рэгіёнаў краіны. Да Рыгора Барадуліна, Алеся Сёмухі-Грынберга, Сяргея Антончыка і іншых далучыўся Барыс Хамайда. Вызначаную частку Бібліі актывіст перапісваў у цэнтры Віцебску.

Падлеткавую папраўчую калёнію ў Віцебску плянуюць зачыніць. Пра гэта паведаміў намесьнік начальніка аддзелу ўпраўленьня прафіляктыкі Міністэрства ўнутраных спраў Валер Мялешка. “Паступова мы прыйшлі да таго, што ў нас застанецца адна падлеткавая калёнія - у Бабруйску, дый там зьмяшчаецца зусім ня шмат зьняволеных. Раней такіх калёніяў было тры - яшчэ дзьве ў Віцебску. Адна зь іх зачыненая некалькі гадоў таму, другую таксама плянуецца зачыніць”, - распавёў Валер Мялешка.